Адунеизегьтәи аҧсуа-абаза конгресс иацнаҵеит Аҧсны абжьаратә школқәа рҵаҩцәа рыбжьара алагаратә арратә ҽазыҟаҵара иазку апроект.
Шьазина Бганҧҳа
Апроект хацнаркит аҭыҧантәи ахаҭарнакрақәа аус рыцуразы АААК аҟәша, Аҧсны Атәылахьчара аминистрреи «Аҧсуа хысратә клуби» иҟарҵо ацхыраара абзоурала.
Уи хықәкыс иамоуп аҿар рыбжьара арратә занааҭқәа ирызку адыррақәа рҳәаа арҭбаара, арратә ҵараиурҭақәа ргәарҧхара, агәабзиара иазеиӷьу аҧсҭазаашьа абзиабара рылааӡара.
Апроект аҳәаақәа ирҭагӡаны раҧхьатәи аусуратә ҭыҵра еиҿкаан 2024 шықәса жәабранмзазы. Уи аамҭа иалагӡаны апроект рхы аладырхәит Ԥақәашь, Аҭара, Цандрыҧшь, Дәрыҧшь, Мгәыӡырхәа ақыҭақәа рыҟнытә аҵаҩцәа.
Ҳазҭоу ашықәс азы апроект раҧхьа рхы аладырхәит Даур Сарсаниа ихьӡ зху Гәыҧтәи абжьаратә школ аҵаҩцәа 15-ҩык. Дара зегьы «Аҧсуа хысратә клуб» аҿы атеориатә ҽазыҟаҵара иахысит, абџьар ахархәараан изықәныҟәатәу аҧҟара хадақәа ҭырҵааит. Анаҩс аҵаҩцәа ацәҟьарақәа иреихсуан.
«АААК ИА Ахантәаҩы Мусса Егзакь хаҭала иҟаиҵаз ацхыраара абзоурала иҳалшоит аҿар Аҧсадгьыл абзиабара рылазааӡо апроект анагӡара. Ииасыз ашықәс азы апроект амҽхаки иалахәыз рхыҧхьаӡареи иаҳдырбеит ари аус анаҩсгьы ишацҵатәу, ауаа рзы ихәарҭаны ишыҟоу», – иҳәеит аҭыҧантәи ахаҭарнакрақәа аус рыцуразы АААК аҟәша анапхгаҩы Дмитри Жьиба.
Апроект ахәыҷқәа ирынаҭо алшарақәа ахәшьара рыҭауа, Гәыҧтәи абжьаратә школ аҿы алагаратә арратә ҽазыҟаҵара мҩаҧызго арҵаҩы Џьумбер Сарсаниа иазгәеиҭеит анаҩстәи:
«Аиҧш зеиҧшу апроект иалахәзароуп еилых ҟамҵакәа ашколхәыҷқәа зегьы. Еиҳараӡакгьы арратә наҧхьара рықәра аҵанакаанӡа. Аурок аҿы дара ироуеит иақәнагоу атеориатә дыррақәа. Аха апрактикатә ҽазыҟаҵарақәа рымҩаҧгаразы алшара Аҧсны ашколқәа зегьы ирымам. Агәра ганы сыҟоуп аҵаҩцәа ирбаз-ираҳаз наунагӡа ишыгәныркыло», – иҳәеит иара.
Апроект аҳәаақәа ирҭагӡаны даҽа хә-ҭыҵрак рымҩаҧгара азҧхьагәаҭоуп.
шәҭалароуп, ма шәыҽҭажәыҩроуп.