АААК ИА Ахантәаҩы Мусса Егзакьи Аконгресс агәыҧи рхы аладырхәит Владислав Арӡынба диижьҭеи 80 шықәса аҵра иазкны Аҧсуа драматә театр аҟны имҩаҧысуаз агәырӷьаратә еилатәара.
Есма Гәаланӡиаҧҳа
Ажәахәқәа рыманы иқәгылеит атәыла Ахада Бадра Гәынба, аполитикатә усзуҩы, апартиа «Иаку Аҧсны» аиҳабы Сергеи Шамба, уаанӡатәи аҧыза-министр, Аҧсны Ауаажәларратә палата алахәҩы Сократ Џьынџьал, Урыстәыла Аҳәынҭқарратә Дума адепутат Константин Затулин, уҳәа Аҧсни Урыстәылеи еицырдыруа егьырҭ ауаажәларра-политикатә усзуҩцәа.
Мусса Егзакь иқәгылараҿы иазгәеиҭеит Аҧсныжәлар Аџьынџьтәылатә еибашьраҿы иргаз аиааиреи ҳәынҭқаррак аҳасаб ала Аҧсны ашьақәгылареи ҷыдала Владислав Арӡынба ишиџьшьоу.
«Владислав Арӡынбеи уи аус ицызуаз ауааҧсыреи аҳәынҭқарра аргылара мацара акәым изҿыз, урҭ рыбзоурала асуверенитет ареалтә ҵакы аанахәеит, ауаа рыҧхыӡ иалаз агәаҳәара лабҿаба иахаанхеит. Иахьагьы ауадаҩра ҿыцқәа рыӡбараан, усҟантәи аҭынха ду ҳазхьаҧшуеит — уи ҳара ҳзы мҩақәҵагоуп, уасхыруп, ажәлар рымаҵ аура – амчра ахықәкы хаданы ишыҟоу ҳгәаланыршәоит».
Мусса Егзакь иқәгылараҿы иазгәеиҭеит Владислав Арӡынба ихьӡ камыршәкәа иаазго, иус ҧхьаҟа иацызҵо ауааҧсыра рааигәара дахьыҟоу даара дшазгәдуу.
«Ӷәӷәала ишшәарҭазгьы, 1992 шықәсазы имҩаҧысит аҧсуа-абаза жәлар раҧхьатәи реизара. Владислав Григори-иҧа ауаа ргәы шьҭихуан иахьа Адунеизегьтәи аҧсуа-абаза конгресс зыхьӡу аиҿкаара ауасхыр ашьҭаҵареи ҳажәлар ракзаара алыршареи рзы. Владислав Арӡынба инысмҩа иаҳгәаланаршәоит аҳәынҭқарра зыхьӡу асимволқәа шракәым, аҳәынҭқарра – есҽнытәи усуроуп, леишәа ҷыдоуп, зымаҵ ууа ажәлар рыгәрагароуп».
Иара убасгьы Мусса Егзакь даҭааит адраматә театр афоие аҿы иаартыз афотоцәыргақәҵа. Уаҟа ауаа иддырбеит Владислав Арӡынба иҧсҭазаареи иусуреи еиуеиҧшым аетапқәа зныҧшуаз афотосахьақәа.
шәҭалароуп, ма шәыҽҭажәыҩроуп.