Афольклористцәа ииашаны аматериал аизгараҿы ирыхәаша азҵаарақәа еидызкыло ашәҟәы ӡырыргеит Аҟәа.
Саид Барганџьиа
Аспециалистцәа ирзынархоу аԥсуа фольклор аизгаразы азҵааранҵа апрезентациа мҩаԥысит Аԥсуа ҳәынҭқарратә университет аҟны (ААУ) иаарту Нарҭдырреи адәынтәи афольклорҭҵаареи рцентр аҟны. Ари ашәҟәы – аинформациа аизгараан афольклористцәеи аетнографцәеи рхы иадырхәаша практикатә цхыраагӡоуп, уаҟа иаагоу азҵаарақәа ажәабжьеиҭаҳәаҩ (жәлар рҿаԥыцтә ҳәамҭақәа еиҭазҳәо – аред.) иҭатәуп.
«Азҵааранҵа адәынтәи аусураан иаҭаху акоуп, афольклортә, аетнографиатә материалқәа реизгаразы. Иара абзоурала ажәабжьҳәаҩ ииашаны иацәажәашьа уақәшәоит, иахьынӡауа ирацәаны аинформациа аиура улшоит», – ҳәа азгәеиҭеит ашәҟәы аредактор хада, апрофессор Зураб Џьапуа.
Иара иазгәеиҭеит убасгьы, абри аҩыза азҵааранҵа аиқәыршәара аидеиа шиоухьаз Аԥсны Аџьынџьтәылатә еибашьра анынҵәа аамышьҭахьҵәҟьа. Убасҟангьы уи ашәҟәы аус адулара далагеит, аха еиуеиԥшым амзызқәа ирыхҟьаны ари аус акырынтә еиԥҟьон. 2016 шықәсазы Аԥсны Аҭҵаарадыррақәа ракадемиеи ахеидкыла «Алашареи» ирыбжьоу аиқәшаҳаҭра аҳәаақәа ирҭагӡаны уи аус аиҭахацыркра алыршахеит, анаҩс 2018 шықәсазы азҵааранҵа шәҟәны иҭыҵит.
Азҵаарақәа реиқәыршәара аус адырулон афольклористцәа Наала Барцыцԥҳаи Саида Ҳаџьымԥҳаи.
«Ашәҟәаҿы иаагоуп зынӡаск еиуеиԥшым азҵаарақәа. Иаҳҳәап: шәаныхәыҷқәаз иарбан лакәқәаз ишәзеиҭарҳәоз? урҭ ирылаз афырхацәа хадақәа шәгәалашәома? – уҳәа убас ирацәаны. Азҵааранҵа хықәкы хадас иамоу – ажәабжьҳәаҩ иахьынӡауа игәылҭәаау аинформациа имхроуп», – ҳәа еиҭалҳәеит Саида Ҳаџьымԥҳа.
Ашәҟәы апрезентациа далахәын Аԥсны аҵареи аҭҵаарадырреи рминистр Адгәыр Какоба, иара иазгәеиҭеит ари ацхыраагӡа аҭыҵра аԥсуа фольклори иааидкыланы аԥсуа ҭҵаарадырреи рзы аҵак ду шамоу.
«Ҳара ҳзы гәахәара дууп ари ашәҟәы аҭыҵра, еиҳаракгьы афольклори аетнологиеи знапы рылаку ҳзы. Раԥхьаӡа иргыланы иазгәасҭарц сҭахуп азҵааранҵа ҳаамҭа иақәшәо ишеиқәыршәоу, аԥсуа фольклор ажанрқәа зегьы шаныԥшуа. Ари џьабаа дууп, аха уи абзоурала афольклор аизгара аус ииашан уазнеиуеит. Абас еиԥш иҟаз алитература даара иаҳҭахын», – иҳәеит Адгәыр Какоба.
Азҵааранҵа атираж 350 цыра ыҟоуп. Атираж ахәҭак аҳҭнықалақь ашәҟәыҭирҭақәа рахь инагоуп, егьи ахәҭа Аԥсны абиблиотекақәа рҿы иҟоуп.
шәҭалароуп, ма шәыҽҭажәыҩроуп.