Урыстәылатәи Афедерациа Адәныҟатәи аусқәа рминистрраҿы имҩаԥысит АААК Иреиҳаӡоу ахеилак ахантәаҩы Мусса Егзакьи аминистр ихаҭыԥуаҩ Андреи Руденкои реиԥылара.
Пресс-служба ВААК
Адунеизегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакьи Урыстәыла Адәныҟатәи аусқәа рминистр ихаҭыԥуаҩ Андреи Руденкои реиԥылара мҩаԥысит аԥшьаша, ԥхынҷкәын 19 рзы ҳәа аанацҳауеити АААК апресс-маҵзура.
Урыстәылатәи Афедерациа Адәныҟатәи аусқәа рминистрраҿы имҩаԥысыз ари аиԥылараҿы ирылацәажәан Аԥсны аҩнуҵҟа Аконгресс имҩаԥнаго аусқәеи, жәларбжьаратәи ахырхарҭала иазԥхьагәаҭоу аусуреи.
Аиԥылара алахәцәа азҿлымҳара аадырԥшит аԥсуа-абаза диаспора ахьынхо атәылақәа рҿы Аконгресс имҩаԥнаго аусура аганахьалеи, Аконгресс арегионалтә ҟәшақәа ахьаарту аҭыԥқәа рҿы АААК анапхгареи Урыстәыла адипломатиатә миссиақәеи русеицура аганахьалеи.
Ишәгәалаҳаршәоит, ҳазҭоу ашықәс ԥхынҷкәынмзазы АААК Иреиҳаӡоу ахеилак ахантәаҩы инапынҵала Европа атәылақәа рҿы ишаартыз Аконгресс арегионалтә ҟәшақәа ԥшьба: Бриатниа Ду, Голландиа, Бельгиа, Германиа. Иара абри аамҭазы Гаагеи Бриуссели имҩаԥысит Аконгресс аусзуҩцәеи арҭ атәылақәа рҟны аус зуа Урыстәылатәи адипмиссиақәа рнапхгареи реиҿцәажәарақәа.
АААК-и Урыстәыла Адәныҟатәи аусқәа рминистрреи реиԥыларақәа уажәшьҭа итрадициа бзиахеит, еиԥыларацыԥхьаӡа аҩ-ганкгьы аинтерес ахьеицрымоу азҵаарақәа рыла ргәаанагарақәа еибырҳәоит, ҭоурыхла ишьақәгылоз аҩ-жәларык реимадарақәа шьаҭас измоу, аҳаҭырқәҵареи, агәреибагареи, аизааигәахареи зныԥшуа Аԥсныи Урыстәылеи реимабзиаратә еизыҟазаашьақәа ҳасаб рзуны.
Адунеизегьтәи аԥсуа-абаза конгресс анапхгареи Урыстәыла Адәныҟатәи аусқәа рминистрра аиҳабыреи еиҿцәажәаратә усеицура шьаҭас иаҵоуп Аԥсны Аҳәынҭқареи Урыстәылатәи Афедерациеи рыбжьара Аиҩызареи, аусеицуреи, аицхыраареи рзы 2008 шықәса, цәыббра 17 рзы напы зҵаҩыз Аиқәшаҳаҭра ду
шәҭалароуп, ма шәыҽҭажәыҩроуп.