Ииасыз уахыки-ҽнаки рыла Аԥсны акоронавирустә чымазара ҿыц уаҩы идбалаӡам.
Ииасыз уахыки-ҽнаки рыла Аԥсны акоронавирустә чымазара ҿкы COVID-19 ҿыц уаҩы идбалам ҳәа адырра ҟаиҵеит Амедицинатә зҵаарақәа рзы Аоперативтә штаб анапхгаҩы ихаҭыԥуаҩ, Аԥсны Агәабзиарахьчара аминистр ихаҭыԥуаҩ Алхас Кәанџьариа есыҽнытәи аштаб ааԥхьараҿы. Ачымазцәа аҩыџьагьы Гагратәиқәоуп, ҭаацәарак иатәуп.
Кәанџьариа еиҭеиҳәеит ачымазара ҿкы зкыз апациентцәа рҩыџьагьы рыхәышәтәра шымҩаԥысуа иахьышьҭоу Гәдоуҭатәи араионтә хәышәтәырҭа хадаҟны, уахи-ҽни аҳақьымцәа рыбла рхуп.
«Актәи апациент иҭагылазаашьа бжьаратәуп, маҷӡак аиӷьхарахь деихеит уҳәартә иҟоуп. Аҩбатәи апациент лҭагылазаашьа хар амам ҳәа азуԥхьаӡар ауеит. Ачымазцәа ирымадаз зегьы ӷәӷәала ахыԥхьакра иқәныҟәоит», – иҳәеит иара.
Аоперативтә штаб анапхгаҩы ихаҭыԥуаҩ иазгәеиҭеит иҳаҩсыз амш азы акоронавирус амазааразы агәаҭара ишахысыз даҽа жәаҩык ауаа. Дара зегьы ачымазара шрымам шьақәырӷәӷәахеит.
Иаҳхысыз аухазы COVID-19 ахьаарԥшыз Гагра араион иахьаҵанакуа акоменданттә сааҭ алагалан. Аҩнуҵҟатәи аусқәа рминистрра иатәу Аҳәынҭавтоинспекциа аиҳабы Баҭал Агрба абри инадҳәаланы атәыла ауааԥсыра рахь ааԥхьара ҟаиҵеит иалагалоу аԥкрақәа ирықәныҟәаларц, Аԥсны ачымазара ҿкы анаҩс алаҵәара аимуурц азы. Акоменданттә сааҭ рылаҳәоуп асааҭ 20:00 инаркны асааҭ 07:00 рҟынӡа. Ишьақәырӷәӷәоу акоменданттә сааҭ аԥҟарақәа еилазгаз ауаа аанкылахоит иара нҵәаанӡа.
2020 шықәса хәажәкыра 24 инаркны Аԥсны аиҳабыра ауааԥсыра акоронавирустә ҿкы COVID-19 рацәыхьчаразы аԥкрақәа аланагалеит – иаанкылоуп ауаа рацәа еизызго аусмҩаԥгатәқәа, иаркуп аҵаратә усбарҭақәа, аҳәынҭқарратә усбарҭақәа русура ҳәааркуп, иаркуп аџьармыкьақәеи ахәаахәҭратә ҭыԥқәеи, афатә-ажәтәи ихымԥадатәу атауарқәеи ахьырҭиуа аҭыԥқәеи аԥҭекақәеи рыда, ауааԥсыра реиҭанеиааира ԥкуп, иара убас егьырҭ аԥҟарақәа алагалоуп.
Хәажәкыра 28 раахыс атәылаҿы иалагалоуп Аҭагылазаашьа ҷыда: аамҭала иаркуп аԥсуа-аурыс ҳәаа адипломатцәеи аруааи рыда атәымуаа зегьы рзы, зыԥсадгьыл ахь ихынҳәуа Аԥсны атәылауаагьы аҳәааҿы ргәаҭара акыр ирӷәӷәоуп.
Аԥсуа наплакцәа иаԥырҵаз агәыҳалалратә хеилак «Ҳара ҳаидгылоуп» алахәцәеи Москватәи аԥсуа диаспора ахаҭарнакцәеи алаҳәара ҟарҵеит Аԥсны ауааԥсыра акоронавирус раҿагылараҿы ацхыраара рыҭаразы аԥара шеизырго. Иахьазы еидкылоуп 50 миллион мааҭ инарзынаԥшуа аԥара.
Аԥсны акоронавирустә чымазара ҿкы COVID-19 аҿагылараҿы ацхыраара азҭарц зҭаху зегьы рзы алшара ыҟоуп рыхәҭалагала ҟарҵарц – Москватәи Аԥсуа Диаспореи «Ҳара ҳаидгылоуп» ахеилаки ирымоу реквизитқәа рахь доусы илшо алаҵарала Аԥсныи Урыстәылатәи Афедерациеи рҟынтә, иара убас Адунеизегьтәи аԥсуа-абаза конгресс ареквизитқәа рахь – Ҭырқәтәылантә, ма Аконгресс асаит аҟны онлаин-ԥарашәара амҩаԥгара. Еизгахо аԥара зегьы Аԥсны ауааԥсыра аҿкы чымазара рацәыхьчареи ргәабзиара ашьақәыргылареи иазкхоит.
шәҭалароуп, ма шәыҽҭажәыҩроуп.