Зыхьӡ нагоу аԥсуааи ашәуааи рыӡбахә еиҭалҳәоит «Аҳаракырахь амҩа» захьӡу лышәҟәаҿы Аԥсны Ашәҟәыҩҩцәеи, ажурналистцәеи реидгылақәа рлахәыла, Аԥснытәи аҳәынҭқарратә университет апрофессор, еицырдыруа аԥсуа журналист, апублицист Екатерина Бебиаԥҳа.

Ари ашәҟәы 49-тәуп Екатерина Бебиаԥҳа лнапы иҵыҵыз рахьтә. Лара гәаартыла илҳәеит лыԥсы ахьнӡаҭоу еицырдыуа ауаа ирызкны аматериалқәа реидкылара дшаҿу. Убас, зыӡбахә ҳамоу ашәҟәы еиднакылоит 30 инареиҳаны аочеркқәа, жәаҩыла ауаа рнысымҩақәа аарԥшуп. Иҟоуп очеркқәак 20 шықәса раҟара аус здылулаз, архивқәа рҟны аматериал еизго.

«Сара санстудентызгьы еицырдыруа аԥсуаа ирызкны аматериалқәа реизгара салагахьан. Урҭ рҭоурых аҩра – сыԥсҭазаара ҵакыс иаиуит», – лҳәеит автор.

Ашәҟәыҩҩы гәацԥыҳәарала иалылкааит Адунеизегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакь изкны илҩыз аочерк. Уи хьӡысгьы иалҭеит «Иџьашьатәу Мусса Егзакь».

Аочерк аҟны еиҭаҳәоуп абаза жәлар рхаҭарнак хьӡырҳәага иԥсҭазааратә мҩа, ԥхьаҟатәи гәҭакқәас имоу ртәы, иазааҭгылоуп ихәыҷреи иқәыԥшреи шымҩаԥысуаз, иигоз аиааирақәеи, иоуаз аԥықәсыларақәеи ртәы уҳәа.

«Мусса Егзакь аиашазы – иџьашьатәу уаҩуп. Иареи сареи ҳабадыруеижьҭеи 20 шықәса инареиҳауп. Абри аамҭа зегьы иалагӡаны еснагь ҳаҭыр дула сацклаԥшуеит ижәлар рзы иҟаиҵо зегьы. Сынтәа насыԥс исыман аԥсуа-абаза хәмаррақәа ирылахәыз сыстудентцәагьы иабасырдырыртә еиԥш аҭагылазаашьа ахьсоуз. Ари аиԥылара астудентцәа ргәы иҭымҵәо иаанхеит. Ҩ-сааҭк зынӡа иҳазгәамҭаӡакәа иниакәкәа ицеит», – ҳәа лгәалашәарақәа ҳацеиҩылшон Екатерина Бебиаԥҳа.

Ашәҟәы иагәылоу афырхацәа дыруаӡәкуп иара убас Аԥснытәи аҳәынҭқарратә университет аректор Алеко Гәарамиа. Иара изку аочерк архиара ҩажәа шықәса инареиҳаны лнапы алакын автор.

«Ҩажәа шықәса раахыс сара еизызгон афото-, аудио-, авидеоматериалқәа. Даара ирацәаны аус зуит», - лҳәеит ажурналист.

Ашәҟәы «Аҳаракырахь амҩа» иагәылоу афырхаҵәа рхыԥхьаӡараҿы иҟоуп убасгьы: ашәҟәыҩҩы Баграт Шьынқәба, ихатәроу аԥсуа политик, ауаажәларратә усзуҩ Константин Озган, архитектор Игорь Смыр, Аԥсны аҩбатәи ахада Сергеи Багаԥшь, апрофессор, академик Олег Еҭлыхә, еицырдыруа абызшәаҭҵааҩы, ҞЧАУ аҭҵаарадырратә усуразы апроректор Сергеи Паз уҳәа убас ирацәаҩны.

Бебиаԥҳа лочеркқәа иаадырԥшуеит лфырхацәа еиуеиԥшым ауадаҩрақәеи аԥсҭазааратә ҭагәҭасрақәеи ишрыниоз, рҟазшьа аҷыдарақәа рхы шцәырыргоз, иара убри алагьы лфырхацәа ҩнуҵҟалатәи рсахьақәа ҭылхуеит, архивтә хыҵхырҭақәа ракәзар, зыӡбахә ҳәоу ахҭысқәа шьақәзырӷәӷәо акакәны иқәгылоит. Аочеркқәа зегьы афотосахьақәа рыцуп, аԥхьаҩцәа афырхаҵа ихаҿсахьа гәылҭәааны ирбарц. Афотосахьақәа реиҳарак ашәҟәы автор иҭылхқәаз роуп.

«Сара изыҩуа зегьы гәыкала-ԥсыкала изыҩуеит, сфырхацәа рахь исымоу агәыбылрала ирԥхоуп, иҭәуп. Зыӡбахә сҳәо ауаа зегьы доуҳала исзааигәоу ракәхоит. Урҭ еснагь сгәалашәараҿ иҟоуп, избанзар сышәҟәқәа рҿы рыԥсы ҭоуп. Сара ауаа р́ҿаԥхьа исыду журналисттә уалԥшьаны исыԥхьаӡоит – иаԥсоу каламԥынҵала ақьаад анҵара. Избанзар знык ашәҟы ианылаз ԥсра-ӡра ақәӡам, зыԥсы ҭоу баҟоуп, ашәышықәсақәа ирхаанхоит», – ҳәа агәра лгоит ажурналист.

Ашәҟәы афырхацәеи автор лхаҭеи еиуеиԥшым аамҭақәа рзы рыԥсҭазааратә мҩақәа џьарак-џьарак еиԥылон. Ажурналистикаҿы, аҭҵаарадырраҿы, арҵаҩратә, ма ауаажәларратә усхкқәа рҿы уҳәа.

Автор лхатә азгәаҭарақәеи лыҭҵаарақәеи рыдагьы ашәҟәы «Аҳаракырахь амҩа» аҟны иаагоуп уи зызку афырхацәа ибзианы издыруа ауаа, рколлегацәа ражәабжьқәагьы.

Екатерина Бебиаԥҳа лхаҭа идырны илҳәоит аҳаракырахь узго амҩа ианакәызаалак ишымариам.

«Ауадаҩрақәа ацуп, зыӡбара хьанҭоу азҵаарақәа рыла ихҟьоуп, аха абарҭқәа зегьы уриааирц азы уқәԥаҩызароуп, ухьаҵрыр ҟалаӡом. Абри ашәҟәы иагәылоу аочеркқәа зызку ауаа зегьы убарҭ аҟазшьақәа рылоуп – ахьамҵреи агәамч аӷәӷәареи. Доусы илахьынҵа иара инапаҿы иҟоуп. Ауаа дуқәа рыԥсҭазаара еснагь иуадаҩуп, уи иаӡрыжәуеит дара. Сара сфырхацәа иҷыдоу рыҩнуҵҟатә доуҳамч ала урыдрыԥхьалоит», – ҳәа лыԥхьаӡоит автор.

Адунеизегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакь ашәҟәыҩҩы даараӡа иҭабуп ҳәа леиҳәеит. Иара иазгәеиҭеит Екатерина Бебиаԥҳа акыршықәса раахыс лыжәлар рыхьӡала «минуҭкгьы даанымгылакәа» аусура даҿуп ҳәа, аԥсуа-абаза милаҭ иналукааша ахаҭарнакцәа рыӡбахә еиҭаҳәауа, ҳтоурых адаҟьақәа аарԥшуа.

«Ишәыдысныҳәалоит ҳара зегь ҳзын абас аинтерес зҵоу, акрызҵазкуа ашәҟәы ахьыҭшәыжьыз. Ҩашьарак сзақәым ҳаԥхьаҟа иҵегь изныкымкәа абас еиԥш аинтерес зҵоу ашәҟәқәа рыла ҳашшәыргәырӷьало. Ари 49-тәи шәџьабаа акәзар, иззынархоу агәалаҟара шьахә шырнаҭо агәра ганы сыҟоуп. Иҭабуп идуӡӡаны ҳәа шәасҳәоит раԥхьатәи ҳаиԥылара инаркны иахьа уажәраанӡа шәнапы злаку аус азы. Сара исныруеит шәыжәлар шаҟа гәыцқьарыла шәырзыҟоу. Шәусура ахаҭабзиара ҳарак шамоугьы азгәасҭоит», – иҳәеит Егзакь.

Екатерина Бебиаԥҳа Адунеизегьтәи аԥсуа-абаза конгресс Аинформациатә портал аҟны аинтервиу анлымырхуаз

© АААК / Наала Аҩӡԥҳа

Ашәҟәы атираж – 400 цыра ыҟоуп. Иааиуа амчыбжь инаркны иааухәар ҟалоит Аҟәатәи ашәҟәыҭирҭақәа рҿы. Ашәҟәы шә-мааҭк роуп изыԥсахо.