Адунеизегьтәи аԥсуа-абаза конгресс Урыстәылатәи Аҭҵаарадыррақәа ракадемиа иатәу Пиотр ду ихьӡ зху Санкт-Петербургтәи антропологиеи аетнографиеи рмузеи (Кунсткамера) аус ацнаулоит. Аусеицуразы аиқәшаҳаҭра рнапы аҵарҩит аҩаша рашәарамза 29 рзы АААК Иреиҳаӡоу ахеилак ахантәаҩы Мусса Егзакьи амузеи адиректор Андреи Головниови.

Амузеи аҟны имҩаԥысыз аиԥылараҿы Адунеизегьтәи аԥсуа-абаза конгресс Иреиҳаӡоу ахеилак ахантәаҩы иҭабуп ҳәа риеиҳәеит Кунсткамера адиректори уи аусзуҩцәеи.

«Ҷыдала иҭабуп ҳәа иасҳәарц сҭахуп Кавказ аетнографиа аҟәша еиҳабу, аҭоурыхтә ҭҵаарадыррақәа ркандидат Макка Сулҭан-Гьери-иԥҳа Аблогачиева, лара лыбзоуралоуп амузеи иааигәаны ишаҳдырызгьы. Шықәсык иалагӡаны ҳара аус рыдаҳулон еицаҳзеиԥшу апроектқәа, абри аиқәшаҳаҭра анапаҵаҩра ҳҽазыҟаҳҵон. Агәра згоит, ҳагәҭакқәа зегьы зеиӷьыҟам ала ишынаӡо, нас дара Кавказ ажәларқәа рҭоурыхтә ҭынхеи Урыстәыла акультура аҿиареи рзы ишхәарҭахо», – иҳәеит Мусса Егзакь.

Амузеи адиректор Андрей Головниов уи аҭакс Мусса Егзакь диаҭабуит, ажәагьы ииҭеит Кавказ ажәларқәа рҭоурых аҭҵаара дшалаго абазақәа рыла.

«Ҳара аетнографцәа ажәлар маҷқәа лымкаала аинтерес ҳазрыцуп, избан акәзар амилаҭ маҷқәа ахеиқәырхара рылшеит, ус анакәха убри рылзыршаз амч ҷыда рылоуп. Уи моу, дара ажәлар дуқәа раасҭа рмилаҭтә хаҿра амырӡра иашьҭоуп. Ажәлар дуқәа уи аҩыза апроблема рымаӡам аҟнытә, амилаҭтә хаҿра аицамкра аганахьала ашьаҿа дуқәа ирызхәыцӡом», – иҳәеит иара.

Андрей Головниов иазгәеиҭеит убас Адунеизегьтәи аԥсуа-абаза конгресс аҭоурыхгьы еиҳа инарҵауланы идырыр шиҭаху.

Аиқәшаҳаҭра зызку

АААК зегь рыла ирыцхраалоит апроект «Урыстәыла иашьагәыҭу ажәлар маҷқәа: аетнокультуратә хәаԥшышьа» иалахәу амузеи аусзуҩцәа, Кавказ адәынтәи аҭҵаарақәа анымҩаԥырго аамҭазы. Аконгресси амузеи еицны аекспедициақәа еицымҩаԥыргаларц ргәы иҭоуп.

АААКи Санкт-Петербург Амилаҭқәа рыҩни аусеицуразы аиқәшаҳаҭра рнапы аҵарҩит

Аиқәшаҳаҭраҿы иарбоуп иара убас Аконгресс ахаҭарнакцәа асеминар «Кавказ – акультурақәа ахьеиқәҿырҭуа» аиҿкаареи аусуреи ралахәхара, Кавказ ажәлар маҷқәа рызҵаарақәа рылацәажәаразы аҵарауаа хатәрақәа адыԥхьаланы.

Аусеицура аҳәаақәа ирҭагӡаны имҩаԥысраны иҟоуп убасгьы еиҭаҵуа ацәыргақәҵа «Аԥсуааи абазақәеи XIX–XX ашә. рзтәи афотосахьақәа рҟны», уи аиҿкааразы аматериалқәа рыԥшаареи разырхиареи аҟны аҩ-еиҿкаарак шеицхыраауа азы еиқәшаҳаҭхеит.

Амузеи алахәхоит 2022 шықәсазы имҩаԥысраны иҟоу Адунеизегьтәи аԥсуа-абаза конгресс аизара ду иазкхо афотоальбом аиқәыршәара.

АААК ацхраауеит Кунсткамереи Аԥсуа ҳәынҭқарратә музеи рыбжьара аиқәшаҳаҭра адкылара аус.

А ҩ-еиҿкаарак аус еицыруеит убасгьы асериа «Ажәларқәеи акультурақәеи» иалало атом «Абазақәа» аиқәыршәараҿы.

Абарҭ иазԥхьагәаҭоу аусқәа рынагӡара нап аркхоит хара имгакәа.