Адунеизегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакь Аԥсны аԥыза-министр Геннади Гагәылиа иҭахара инадҳәаланы иҭаацәеи, иуацәеи, иҭынхацәеи рахь адышшылара ҟаиҵеит.

Егзакь иазгәеиҭеит Геннади Леонид-иԥа Гагәылиа илагала шырацәоу Аԥсны аҳәынҭқарра аргылареи уи асоциалтә-економикатә ҿиареи рус аҿы.

«Аԥсны абзиаӡбахә адунеи аларҵәараҿы иара илагала ахә ашьара уадаҩуп, убри аҟара ирацәоуп. Абас зымҽхак дуу ахаҭара заа ицара – цәыӡ дууп аԥсуа жәлар зегьы рзы», – иҳәеит Егзакь.

Аконгресс Иреиҳаӡоу ахеилак ахантәаҩы иациҵеит аԥыза-министр, апатриот иаша игәалашәара – иара ихаану зегьы рҿы ишҿымцәаауа. Егзакь иазгәеиҭеит иара убас хыԥхьаӡара рацәала Геннади Гагәылиа иаԥшьгамҭақәа Аԥсны жәлар ирыхәо аус бзиақәа рыла ишрыцҵахо.

Аԥсны аԥыза-министр Геннади Гагәылиа дҭахеит амҩатә машәыр аан, цәыббрамза 8 рзы амҩаду «Ԥсоу-Аҟәа» дшаныз.  Иара дызҭатәаз амашьына аиҳабыра ркортеж иахәҭакны Шәачатәи аҳаирбаӷәазантә Аԥсныҟа иаауан, Шьамтәылаҟа официалла раҭаара хыркәшаны. 
Геннади Гагәылиа диит 1948 шықәса, ажьырныҳәамза 4 рзы Лыхны ақыҭан. 

1972 шықәсазы Белоруссиатәи аполитехникатә институт аргыларатә факультет далгеит. 
1977-1986 шықәсқәа рзы Риҵа аӡиаҿы ауааԥсыра рыкрыфара аиҿкааразы акомбинат адиректор ихаҭыԥуаҩыс дыҟан. 1986-1991 шықәсқәа рзы аус иуан Гәдоуҭа араион ахархәаратә кооперациа ахантәаҩыс.

1991 шықәса инаркны Аԥснытәи АССР адәныҟаекономикатә еимадарақәа рзы Аҳәынҭқарратә комитет ахантәаҩыс дыҟан; 1992-1995 шықәсқәа рзы – Аԥсны Аминистрцәа Реилазаара ахантәаҩы ихаҭыԥуаҩыс, 1995-1997 шықәсқәа рзы – Аԥсны аԥыза-министрс. 1997 шықәсазы Урыстәыла Аҳәынҭқарратә Дума адепутат ицхырааҩыс аус иуан. 2002 шықәсазы Аԥсны Ахәаахәҭра-ааглыхратә палата аԥиҵеит, дагьахагылеит. 2002-2003 шықәсқәа рзы аҩынтә раан Аԥсны аԥыза-министрс дҟаҵан. 

2003-2004 шықәсқәа рзы Аԥсны ахада иусбарҭа анапхгаҩыс аус иуан. 2005 шықәса инаркны ҩаԥхьа Ахәаахәҭра-ааглыхратә палата хадара азиуан.

Геннади Гагәылиа ахынтә раан Аԥсны аԥыза-министр имаҵура наигӡон 2018 шықәса мшаԥымза 24 инаркны.