Лента событий ВААК
"Ирӡтәым" алекциа ҿыц аԥсуа жәлар рыкәашара иазкхеит.
Апроект "Ирӡтәым" аҳәаақәа ирҭагӡаны имҩаԥгаз алекциа ҿыц мҩаԥысит Д. Кәабахьиа ихьӡ зху Гәдоуҭатәи абжьаратә аԥсуа школ № 5 аҟны. Уи аԥсуа милаҭ кәашара аҭоурых иазкын.
Амастер-класс мҩаԥылгеит Аԥсны Жәлар рартистка, Адыгатәыла зҽаԥсазтәыз артистка, Ахьӡ-Аԥша аорден III аҩаӡара занашьоу Маиа Гьерзмааԥҳа. Лара еиҭалҳәеит аԥсуаа рыкәашашьаҿы аҭыԥҳа леиҭаҵшьақәа рыҽшырԥсахуаз. Алекциаҿы атеориагьы апрактикагьы еилагӡан. Маиа Гьерзмааԥҳа ахәыҷқәа даарывагыланы акәашашатә шьаҿақәа длырбеит, рнапқәеи ршьапқәеи ииашаны ишыктәу дахылаԥшны.
Апроект "Ирӡтәым" ҳазҭоу ааԥынра алагамҭазы ихацыркын. Аиҿкааҩцәас иҟоуп Адунеизегьтәи аԥсуа-абаза конгресси Аԥснытәи аҳәынҭқарратә университет аԥсуа бызшәа акафедра арҵаҩы Инна Џьуӷьелиаԥҳаи. Хықәкыс иамоуп еизҳауа аҿар рыжәлар аҭоурых, акультура, аҵас-қьабзқәа еиҳагьы инарҵауланы ирдырыртә аҟаҵара.