Лента событий ВААК
Ахра Аҩӡба зхаҿы дгылоу Донбасс абнатә дивизиа АААК Аҟәатәи аофис иаҭааит.
Аԥсны Аиааиреи Ахьыԥшымреи рымш аламҭалазы "Пятнашка" аибашьцәеи рыдҵаҟаҵаҩ Ахра Аҩӡбеи Аконгресс аофис иаҭааит. Аиԥылара аиҩызаратә ҟазшьа аманы, иҟәанданы имҩаԥысит. Азҵаарақәа жәпакы ирылацәажәеит. Акультуреи, амилаҭ хаҿреи, аидгылареи, аҭышәынтәалареи, аҭынчреи, ашәарҭадареи реиқәырхара шаҭаху рҳәеит.
Зқьышықәсала ҳабдуцәа рабдуцәа рҟынтә имырӡкәа иаарго акультура, ҳара ҳзыхьчо, егьырҭ ҳрылазмырӡо абызшәеи иареи шакәу анеилаҳкаалак, ҳазнеишьагьы даҽакхоит. Ҳара агәра ганы ҳаҟоуп Аԥсуарада иахьагьы хеиқәырхашьа шҳамам. Мҩашьарада иаҳдыруазароуп, ҳхаҿы иааҳгалароуп ихьчатәны иҳамоу, ҳазхыԥар иҟамло аҵасқәеи ақьабзқәеи закәу", - иҳәеит Аконгресс Иреиҳаӡоу ахеилак ахантәаҩы Мусса Егзакь.
"Ҳахьыҟазаалак еснагь ҳаицуп, ҭаацәарак еиԥш ҳаибабоит, дасу илшо-дызхәарҭоу ҳдыруазароуп, Аԥсназы акрызҵазкуа азҵаарақәа рыӡбара иазыхиоу хьыӡҳәала иаҳзеиқәыԥхьаӡартә ҳаҟазароуп", - ҳәагьы ациҵеит иара.
Аконгрессуаа рысасцәа ирзеиҭарҳәеит усқәас изҿу, аҟәшақәа шеихшоу уҳәа. Иааизгьы рзеиӷььарақәеи ргәаанагарақәеи рҳәеит ԥхьаҟа аусеицура рыбжьалозар, хырхарҭас иаиуша иазкны.
