АААК иалоу аҳәсақәа ррегионалтә хеилакқәа аус рыцуразы акоординатор Гета Арӡынԥҳа Москва имҩаԥысыз аԥсуа культура афестиваль «Аԥсны» аҟны иаартыз Аконгресс апавильон аусура аихшьалақәа ҟалҵеит.
Адунеизегьтәи аԥсуа-абаза конгресс иалалеит 30-ҩык ауааԥсыра Москва имҩаԥысуаз аԥсуа культуратә фестиваль «Аԥсны» аҳәаақәа ирҭагӡаны ҳәа адыра ҟалҵеит АААК иалоу аҳәса ррегионалтә хеилакқәа аус рыцуразы акоординатор Гета Арӡынԥҳа. Ари акультура афестиваль ахьымҩаԥысуаз москватәи апарк «Красная пресня» аҟны цәыббра 30 рзы иаартын Аконгресс апавильон, изҭахыз зегьы уи инадгыланы Аконгресс иалалар рылшон.
Аконгресс апавильон аусура убас еиҿкаан, уи иаҭаауаз азхәыцны, иргәаԥханы Аконгресс алаларазы аӡбамҭа рыдыркылартә еиԥш: аволонтиорцәа инарҭбааны иеиҭарҳәон Аконгресс аусура ззынархоу ахықәкқәа, раԥхьаӡа иргыланы – адунеи иалаԥсоу аԥсуа-абаза жәлар реидкылара.
«Ҳусураҿы иџьаҳшьашаз амомент ҟалеит, аурыс ӡӷаб, игәцаракны иаҳзыӡырҩуаз, Аконгресс алалара сҭахуп ҳәа данааҳадгыла. Лара лажәақәа рыла, «аргылара иазынархоу апозитивтә идеиақәа ҳрымҽхакны ҳаҟоуп», убри аҟнытә ларгьы ҳаилазаара дахәҭакзарц лҭаххеит», – ҳәа ҳзеиҭалҳәеит Арӡынԥҳа.
Лара иазгәалҭеит ҿыц Аконгресс иалалаз рхыԥхьаӡараҿы ишыҟоу ԥшьҩык ашәуа ҭыԥҳацәа, урҭ руаӡәы аҳәса ррегионалтә хеилак аҿы хатәгәаԥхарала аусура дазхиоуп.
«Абазашҭантә ҳахәшьцәа гәахәара дула анкета хадырҭәаауан, урҭ гәык-ԥсыкала ҳусураҿы иҳавагылазарц рҭаххеит. Руаӡәы, Инна Дармилова, АААК иалоу аҳәса ррегионалтә хеилак далахәзарц лҭаххеит. Уи даара ҳаигәырӷьеит. Хымԥада, лара ҳусура далаҳархәуеит», – ҳәа лгәы ацԥыҳәаны еиҭалҳәеит Гета Арӡынԥҳа.
Лара иазгәалҭеит иара убас, апавильон аусура ишахәҭакыз аетнозона аиҿкаара. Уи еиҿкаан аԥсуа милаҭтә хаҿра зныԥшуаз аҩычагақәа рхархәарала, иара убас еиқәыршәан «Аԥсны аҭоурыхтә бираҟқәа» рцәыргақәҵа маҷ. Маҭәарцыԥхьаӡа рыла аԥсуа цәаҩа аарԥшра хықәкыс иаман ажәлар ракзаара арбара. Убри азоуп аекспозициа атрибут хаданы изаиуз Аԥсны абираҟ – иаарту амаҿа акыр шәышықәса раахыс аԥсуааи ашәуааи еиднакылон, иахьагьы ҳаидкыланы ҳакуп.
АААК апавильон аҿы иқәыргылаз аекран аҟны ицәырган Аконгресс аинформациатә портал, убри аҟнытә аҭааҩцәа зегьы уи аусушьа рбар рылшон. Аволонтиорцәа еиҭарҳәон асаит аҟны аҽҭаҩра шыҟало, еиуеиԥшым аинформациа иманшәаланы ишыԥшаатәу. Уи адагьы зегьы ирызшан Аконгресс аусура атәы инарҭбааны иахьаҳәо аинформациатә буклетқәеи, асаит аҭыӡҭа зныз авизиткақәеи, аҽҭаҩра, ма иаҳа ихарҭәаау аинформациа зҭаххо рзы.
Зеиԥшла апавильон аусура ахҳәаа азыҟауҵозар, аҳәаанырцә инхо ҳџьынџьуаа рахь ааԥхьара аҟаҵара иазкын уҳәар ауеит, аганаҿ инымхарц, абаза жәлар реидкылара хықәкыс измоу Аконгресс иалаларц, уи аусура иахәҭакхарц.
«Аҳәаанырцәтәи ҳџьынџьуаа рыбжьара Аконгресс ахь иҟоу аинтерес акырӡа идууп, – ҳәа азгәалҭеит Гета Арӡынԥҳа. – Апавильон иаҭаауаз шамахамзар зегь зызҵаауаз акакәын: ҳашԥашәыцхраауеи, ҳашԥашәывагылои ҳәа. Ҳусура ззынархоу ауааԥсыра агәцаракра ахьыҟарҵаз, ҳәарада, ҳаргәырӷьоит. Аԥсуа милаҭ ҳҵасқәеи, ҳқьабзқәеи, ҳкультуреи реиқәырхара иашьҭоу ауаа маҷым».
АААК иалоу аҳәсақәа рхеилак акоординатор агәра ганы дыҟоуп, ари ахырхарҭала аусура ишацҵалатәу, Аконгресс аӡбахә иаҳагьы ирацәаҩны ираҳаразы, уи иалало рхыԥхьаӡара иацларазы.
Ас еиԥш арккаратә усура иаанашьҭуа алҵшәақәа рыхә ҳаракны ишьатәуп. Ари афестиваль – адиаспора рхаҭарнакцәа реиныриара адагьы, аԥсуа доуҳаи, ахшыҩҵак ҿыцқәеи зегьы иахьеицҳауа ҭыԥхеит. Иара убри алагьы ҳдацԥашәқәа ҳхашҭӡом, ҳкультуреи, ҳқьабзқәеи рыԥшӡара ҳагәылахалоит. Сара сгәы иаанагоит абри афестиваль иаҭааз зегьы, уаҟа ирбаз-ираҳаз акыраамҭа ргәы иҭымҵәо ацәанырррақәа шырзыннажьуа», – ҳәа лажәа хлыркәшеит лара.
Гета Арӡынԥҳа иара убас дшақәгәыӷуа лҳәеит хара имгакәа Москва ақалақь аҿы аҳәса рхеилак арегионалтә ҟәша аартра.
✊️
шәҭалароуп, ма шәыҽҭажәыҩроуп.