Цәыббра 18 рзы Аҟәа имҩаԥысит Адунеизегьтәи аԥсуа-абаза конгресс аинформацатә портал апрезентациа.
Саид Барганџьиа
Адунеизегьтәи аԥсуа-абаза конгресс (АААК) аофициалтә информацатә саит цәырыргеит Аԥсуа телехәаԥшра астудиаҿы имҩаԥысыз апресс-конференциаҿы аҩаша, цәыббрамза 18 рзы. Аконгресс аусуреи аԥсуа-абаза диаспора рыԥсҭазаашьеи ирызку апортал ҿыц ӡырыргеит, иагьахцәажәеит уи анапхгаҩы, аредактор хада Амина Лазԥҳаи, Аконгресс анагӡаратә маӡаныҟәгаҩ Инар Гыцбеи.
Апортал анапхгаҩы апресс-конференциа алахәцәа идлырбеит Адунеизегьтәи аԥсуа-абаза конгресс аԥҵара аҭоурыхи, аинформациатә портал хықәкыс иамоуи ирызкыз адокументалтә фильм.
Амина Лазԥҳа иазгәалҭеит, апортал аҟны ишцәыргахо Аконгресс аусуреи, аԥсуа-абаза жәлар рхаҭарнакцәа рынхашьеи ирызку аинформациа. Апортал ианыло аматериалқәа зегьы Аԥсны абзиаӡбахә адунеи аларҵәара иазынархоуп.
«Апортал ианыло аинформациа зегьы агуманитартә ҟазшьа амазаауеит. Ҳара адунеи иазеиҭаҳҳәалар ҳҭахуп ҳҭоурых, ҳкультура, ҳетнографиа зеиԥшроу, хьӡи-ԥшеи змоу ҳажәлар рхаҭарнакцәа рыӡбахә уҳәа. Адунеи ҳҽазааҳартлоит. Иаҳҳәаша ҳамоуп, ҳазхыҽхәашагьы ҳамоуп», – лҳәеит Лазԥҳа.
Апортал анапхгаҩы иазгәалҭеит асаит аҿы «ишыҟамло аполитикатә хырхарҭа змоу аматериалқәа, ауаажәларра-политикатә еиҿкаарақәеи, апартиақәеи, ма алхратә кампаниақәеи рӡыргара хықәкыс измоу». Лара иалылкааит апортал аусура ихадароу ҩ-хырхарҭак: аинформациатә-рккаратә, ахархәаратә.
Абри ахҭыс иазку авидео ахәаԥшра>>
Амина Лазԥҳа еиҭалҳәеит, агәаҳәара змоу зегьы асаит аҟны аҽҭаҩра шрылшо, уи ашьҭахь ахархәаҩцәа рбазала аԥсуа-абаза жәлар рхаҭарнакцәа адунеи зегьы аҟны рыԥшааразы алшара ҟалоит. Лара иацылҵеит иара убас аԥхьаҟа ргәы ишҭоу ахархәаҩцәа дара-дара злеицәажәаша афункциа ацҵара.
Апрезентациаҟны шьаҿа-шьаҿала идырбан АААК аинфопортал аҟны аҽҭаҩра апроцесс шымҩаԥысуа.
«Даара имариоуп. Аҽҭаҩразы ахархәаҩ ҩ-минуҭк роуп ииҭаху», – ҳәа апресс-конференциа алахәцәа агәра длыргеит Амина Лазԥҳа.
Лара иазгәалҭеит апортал аматериалқәа ф-бызшәак рыла ишкьыԥхьхо: абаза бызшәа, аԥсшәа, аурысшәа, англыз, аҭырқәа, араԥ бызшәақәа рыла. Иахьазы асаит аус ауеит хә-бызшәак рыла: араԥ версиа макьана аус адулара цоит, хара имгакәа уигьы цәыргахоит.
АААК анагӡаратә маӡаныҟәгаҩ Инар Гыцба иазгәеиҭеит апортал аусура – Аконгресс ахықәкы хада – аԥсуа-абаза жәлар рхаҭарнакцәа реизакра анагӡараҿы акрызҵазкуа мыругазаауеит ҳәа.
«Иахьа аинформациатә технологиақәа раамҭазы ажәлар реидкылара иаҳа иашоуп ҳаамҭазтәи акоммуникациатә хархәагақәа рыцхыраарала, раԥхьаӡа иргыланы, аинтернет ресурсқәа рыла. Убри аҟнытә аинформациатә портал азынархоуп адунеи иалаԥсоу
ҳажәлар рхаҭарнакцәа зегьы реидкылара, реизааигәатәра», – иҳәеит Аконгресс анагӡаратә маӡаныҟәгаҩ.
Ажурналистцәа рызҵаарақәа рҭак ҟаҵо иара иазгәеиҭеит Аконгресс аусура хырхарҭа хадақәас иамоу, АААК аструктура аԥҵара шымҩаԥысуаз, ԥхьаҟагьы гәҭакқәас ирымоу.
Апрезентациа цонаҵы апресс-конференциа алахәцәа алшара рыман арзаҳал харҭәааны Аконгресс алалара.
АААК аинформациатә портал аус ахьынӡадырулоз шықәсыбжак иалагӡаны еизган аматериалқәа раԥҵаразы аинформациа рацәаны: 50 Гб инареиҳаны аинформациа, 700 даҟьа атекст, зқьы инареиҳаны афото-видео материалқәа.
шәҭалароуп, ма шәыҽҭажәыҩроуп.