Санкт-Петербург иҟоу Антропологиеи аетнографиеи рмузеи (Кунсткамера) Кавказ аҟәша аҟны имҩаԥысит асеминар "Кавказ - акультурақәа реихысырҭа" ҳәа хьӡыс измаз, абҵара 23 рзы.
Есма Гәаланӡиаԥҳа
Асеминар аҳәаақәа ирҭагӡаны дықәгылеит Амузеи Антропологиа аҟәша аҭҵаарадырратә усзуҩ еиҳабы, абиологиатә ҭҵаарадыррақәа ркандидат Роза Схалиахәа. Лара лажәахә иахьӡын "Аԥсуаа-адыгаа ргенофонд: аҭҵаарақәа рҭоурыхи рԥеиԥши".
Аҵарауаҩ азыӡырҩцәа ирзеиҭалҳәеит аԥсуа-адыга еимашьҭрақәа еиуеиԥшым агенетикатә системақәа рыла рыҭҵаара аҭоурых атәы. Ари атема иазку хадара злоу аусумҭақәа еиқәылԥхьаӡеит, иара убас дазааҭгылеит аурыси аҳәаанырцәтәи аҵарауаа атемала иззааихьоу алкаақәа.
Зыӡбахә лҳәоз аҭҵаарақәа рылкаа хадақәа рыла еиқәшәоит: аԥсуа-адыга бызшәатә ҭаацәара иаҵанакуа ажәларқәа зегьы хылҵшьҭрала еизааигәоуп, еигәыцхәуп. Уи шьақәнарӷәӷәоит дара ретногенез, рбызшәатә акзаара. Ажәытәӡа Кавказ иқәынхоз ажәларқәа Азиа Ааигәа ишамадазгьы шьақәырӷәӷәахоит иара Кавказ ахаҭа ауааԥсыра рықәнагалара аҭоурых ала. Ажәахә аҟны иаарԥшуп ажәытәӡатәи ДНК аҭҵаарақәа рганахьала аҳәаанырцәтәи алабораториақәа ироуз адыррақәа. Иара убас, Роза Арамби-иԥҳа инарҭбааны далацәажәеит Кавказ ажәларқәа ԥхьаҟатәи рыҭҵаара ԥеиԥшқәас, хырхарҭақәас иамоу.
шәҭалароуп, ма шәыҽҭажәыҩроуп.