IX-тәи Аԥсны-урыстәылатәи аусутә форум мҩаԥысит Аҟәа, жьҭаара 12 рзы.
Саид Барганџьиа
Аҟәа имҩаԥысит IX-тәи Аԥсны-урыстәылатәи аусутә форум. Ишаԥу еиԥш, уаҟа ирылацәажәон аекономика аганахьала Аԥсныи Урыстәылеи русеицура азҵаарақәа, иӡырган аалыҵ ҿыцқәеи, атехнологиа ҿыцқәеи, ҳаамҭазтәи аекономикеи абизнеси рҟны актуалра змоу атемақәа рыла астол гьежьқәа мҩаԥган.
Афорум алахәцәа рахь ааԥхьаратә шәҟәы назышьҭыз Аԥсны ахада Рауль Ҳаџьымба иажәақәа рыла, аусутә форум «есышықәса еиҳа-еиҳа аҿиара аиуеит, иаанашьҭуа алҵшәақәа ирыцлоит, иҟанаҵо анырра еиҳахоит, апрактикатә хықәкқәа рынагӡара иазынархоуп». Ахада иажәа иалан иара убас, есышықәсатәи аусутә форум Аԥсныи Урыстәылеи рыбжьара аекономикатә еизыҟазаашьақәа рыҿиараҿы аҭыԥ хада шааннакыло, аҩ-тәылак реиҩызареи рыстратегиатә усеицуреи рырӷәӷәара ишацхраауа.
Аусура ҳазхиоуп
Апленартә еилатәараҿы дықәгылеит Аԥсны аекономика аминистр Адгәыр Арӡынба. Иара иазгәеиҭеит есышықәса имҩаԥысуа аусутә форум шҭышәынтәалаз, иахьазы реиҳа иактуалтәу аԥсуа-аурыс економикатә усеицура азҵаарақәа рыла хра злоу агәаанагарақәа реибыҳәара ахьалшо усмҩаԥгатәны ишыҟалаз.
«Аинвестициатә еиқәшаҳаҭрақәа рнапаҵаҩрақәа мҩаԥысуеит, ихырҳагоу агоризонталтә еимадарақәа шьақәгылоит», – ҳәа ациҵеит Арӡынба.
Сынтәа урыстәылатәи аделегациа дахагылан Нхыҵ Кавказ аусқәа рзы аминистр ихаҭыԥуаҩ Игор Кошин. Афорум аартраан иара иазгәеиҭеит Урыстәылатәи Афедерациеи Аԥсны Аҳәынҭқарреи рыбжьара аусеицура хырхарҭа рацәала аҿиара ишаҿу. Кошин иазгәеиҭеит, жәашықәса рыҩнуҵҟала Аԥсныи Урыстәылеи еиуеиԥшым аҳәынҭқаррабжьаратә усеицура ахырхарҭақәа рыла шәкы инареиҳаны аиқәшаҳаҭрақәа шрыбжьарҵахьоу.
Аԥсуа ҩқәа, ашә, ацифратә технологиақәа
Ареспубликтә инвестициатә агентра афорум аҟны еиҿнакааит Аԥсны анаплакқәеи аилазаарақәеи рцәыргақәҵа, уаҟа аԥснытәи анаплакқәа раалыҵ ҿыцқәа цәырыргар рылшон. Убас, «Амра-Банк» иӡырнагеит амобилтә цхыраагӡа – абанк аклиент онлаин арежим аҟны ифинанстә усқәа рымҩаԥгара илзыршо. «Аԥсны Асбербанк» ицәырнагеит аиубилеитә аԥсарқәеи, 500 аԥсар ицо, Владислав Арӡынба дызну ақьаадтә ԥареи, ишдыру еиԥш, уи ҭыжьын ҷыдала Аԥсны Аџьынџьтәылатә еибашьраҿы Аиааиреи Ахьыԥшымреи рныҳәамш 25 шықәса ахыҵра аҳаҭыразы. Ицәырган иара убас аиҿкаара NEM астендгьы, уи «блокчейн-платформа» ҳәа изышьҭоу ахархәага аԥнаҵоит. Ацәыргақәҵа иалахәын Аҟәатәи ахш зауад, иара убас Гал араион аҿы иаартыз иҷыдоу аекономикатә зона «Амра». Раалыҵ цәырыргеит ааигәа иаартыз аҩы зауад «Абхазвино» аусзуҩцәагьы.
«Гәахәара дула абри ацәыргақәҵа ҳалахәуп. Афорум алахәцәа аӡәырҩы иргәаԥхеит иҭҳажьуа аҩы. Аҩқәа жәа-хкык цәыраҳгеит, даарагьы ҳаигәырӷьоит ауаа иргәаԥханы агьама ахьырбоз», – иҳәеит аҩыҭаҭәарҭа ацех аиҳабы Дауҭ Шәлымба.
Ихадароу иалацәажәеит
IX-тәи Аԥсны-урыстәылатәи аусутә форум аҳәаақәа ирҭагӡаны имҩаԥысит астол гьежьқәа ԥшьба. Урҭ рҟны излацәажәаз азҵаарақәа иреиуоуп Аԥсныи Урыстәылеи рыбжьара адәныҟа-економикатә усеицура, хаҭалагьы атуризм аганахьала аусеицура, аԥсшьаразы иҟоу алшарақәа реиӷьтәра амҩақәа уҳәа убас иҵегьы. Астол гьежьқәа рҟны иалацәажәеит иара убас ҩ-тәылак русеицура ахырхарҭаҟны абанктә сектор иааннакыло аҭыԥ, Аԥсны аекономика аҿиара афактор аҳасабала. Раԥхьаӡа акәны аусутә форум аҟны имҩаԥган аинформациатә технологиақәеи, аинновациақәеи ирызкыз астол гьежь. Уи напхгара азиуан Аԥсны аекономика аминистр ихаҭыԥуаҩ Баҭал Ҭарба.
«Сынтәа ҳазхәыцны абри ахырхарҭала иҷыдоу астол гьежь еиҿаҳкааит, адунеи зегь аҟны иахьа актуалра зҵоу азҵаарақәа абраҟагьы ҳрылацәажәарц. Уахь иаҵанакуеит ацифратә економика аргылара азҵаарақәа, аинновациатә ҿиареи, ацифратә трансформациеи рызҵаарақәа уҳәа. Ҳара излаҳаԥхьаӡо ала, арҭ азҵаарақәа ҳтәыла азгьы актуалра рымоуп», – иҳәеит Ҭарба.
IX-тәи Аԥсны-урыстәылатәи аусутә форум алахәцәа рыбжьара иҟан Урыстәыла Афедерациақәа Рхеилак алахәцәа, Донецки Лугански жәлар республикақәа рекономика аминистррақәа рнапхгаҩцәа, Ермантәылеи Сингапури рҟынтә абизнесуаа.
Аԥсны-урыстәылатәи аусутә форум мҩаԥысуеит 2009 шықәса раахыс. Иара аиҿкааҩцәас иҟоуп Аԥсны Аекономика аминистрреи, Урыстәылатәи Афедерациа Аекономика аминистрреи, афорум адгылара анаҭоит иара убас Росконгресс Афонд.
шәҭалароуп, ма шәыҽҭажәыҩроуп.