Саид Барганџьиа

АААК Аҭыԥантәи аҟәшақәеи аҿар рактивқәеи ркоординатор иҭыԥ ахь ирылаҳәаз аицлабра иалҵшәаны ҩыџьа акандидатцәа алхын. Уажәшьҭа хымз ирылагӡаны арҭ арԥарацәа акоординатор инапынҵақәа нарыгӡалоит, аԥышәараамҭа анхыркәшахалак Аконгресс анапхгара ари амаҵура еиҳа изықәманшәалахо руаӡәк далнакаауеит.

Абас ала аԥышәараамҭа ахысра – АААК аконкурс аԥҟарақәа ишырҳәо ала, ахыркәшаратә етап ауп. Аконгресс азин амоуп ари аԥышәара анхыркәшахалак ашьҭахь аҩыџьагьы рҟынтә аӡәгьы иалымхрагьы. Аконкурс афиналистцәа алкаахеит АААК ахантәаҩы Мусса Егзакь иҿцәажәара аамышьҭахь. Иара иҳәеит Аконгресс аус шауа хадара злоу аԥсуа-абаза жәлар рызҵаарақәа рыла: аетнокультуратә акзаара арӷәӷәара, ахатәы бызшәеи аҵас-қьабзқәеи реиқәырхареи рырҿиареи Аԥсни Ҟарачы-Черқьестәылеи рыҟнеиԥш адиаспора ахьынхо атәылақәа рҿгьы. Акоронавирустә пандемиа иахҟьаны иҟалаз аиԥҟьара аамышьҭахь еиҳагьы ирацәаны аус улатәуп. Убри аҟнытә Аконгресс аштат ахь иҵегь аусзуҩцәа гатәхеит, аусмҩаԥгатәқәа зегьы еиҳа иласны, қәҿиарала рынагӡаразы.

«Абарҭқәа ҳасаб рзуны ҳара аконкурс мҩаԥаҳгеит, ҳкомандаҿы аусура реиҳа ианаало ауаҩ иалкааразы. Аҿар бзиаӡа ҳамоуп: аҵареи, ааӡареи, зыԥсадгьыл агәыбылреи згым», – иҳәеит Егзакь.

АААК ауснагӡаратә маӡаныҟәгаҩ Инар Гыцба еиҭеиҳәеит зынӡа аконкурс ишалахәыз 30-ҩык ауаа.

«Акандидатцәа зегьы аҵара рыман, руаҩышәатә ҟазшьақәеи рыпрофессионалтә зыҟаҵареи акала иҟәнушьартә иҟамызт, уимоу, атәым бызшәақәагьы здыруаз маҷҩымызт. Аха еиҳарак иалыскаарц исҭаху – ргәы былуан, иаҳцәагои ҳәа арзаҳал алазҵаз ракәмызт. Убри аҟнытә алхра акыр иуадаҩын», – иҳәеит Гыцба.

Уажәы хымз рыбжьара акандидатцәа инарыгӡараны иҟоу аусқәа еиҳарак изыдҳәалоу – иаарту аҭыԥантәи аҟәшақәа рактивқәа аус рыцуреи аҟәша ҿыцқәа раартреи роуп.

Аҭыԥантәи аҟәшақәа ркоординатор иҭыԥ ахь иқәгылоу ҩыџьа русура нап адыркит

© АААК / Наала Аҩӡԥҳа

Акоординатор (аҳәаақәҵаҩ) иуалԥшьақәа

Аҭыԥантәи аҟәшақәеи аҿар рактивреи рҳәаақәҵаҩс иҟало абарҭ аусқәа инапы рылакзаауеит:

· АААК Аҭыԥантәи аҟәшақәа раԥҵареи, урҭ рыпроектқәеи русмҩаԥгатәқәеи рыплан аиқәыршәареи далахәзароуп, АААК аԥҟаԥҵәатә хықәкқәа рынагӡара иазынархоу, асоциалтә ҵакы змоу апроектқәа роуп ара зыӡҩахә ҳамоу.

· Аҭыԥантәи аҟәшақәа русура ахылаԥшра, араионқәа рыбжьара аҟәшақәа дара-дара русеицура аҳәаақәҵара даҿызароуп, аусура аплан еффективла, ианаамҭоу анагӡаразы.

· Аусура аплан аҳәаақәа ирҭагӡаны Аҭыԥантәи аҟәшақәа имҩаԥырго апроектқәеи апрограммақәеи рынагӡашьа аекономикатә еффективра дацклаԥшлароуп, Аҭыԥантәи аҟәшақәа русура ҳаамҭа иақәшәо, ихырҳагоу аметодқәа рыла еиҿкаалароуп.

· Аҭыԥантәи аҟәшақәа инарыгӡо проектцыԥхьаӡа, усмҩаԥгатәцыԥхьаӡа ирыдҳәалоу адокументациа аиқәыршәара далахәзароуп, адокументқәа зегьы ахьынӡаиашоу гәеиҭалароуп, еиҿкааны имазароуп, АААК ацентртә офис ахь рынашьҭра дахылаԥшлароуп.

· Инапы иану аусқәа рганахьала аҳасабырба аҟаҵара (анапхгара рыдҵала, еиуеиԥшым апрезентациақәа рымҩаԥгарагьы уахь иналаҵаны) идуп.

· Есышықәсатәи акультуратә-спорттә фестиваль «Абаза» аиҿкаареи амҩаԥгареи дрылахәзароуп.

· АААК Аинформациатә портал анапхгаҩи аусзуҩцәеи ианаамҭоу адырра риҭозароуп Аҭыԥантәи аҟәшақәа имҩаԥыргараны иҟоу апроектқәеи апрограммақәеи рганахьала.

· Иреиҳаӡоу ахеилак ахантәаҩи, Ауснагӡаратә маӡаныҟәгаҩи, Аппарат анапхгаҩи имҩаԥысуа апроектқәа рҵыхәала иҟарҵо азгәаҭарақәа анализ рзуны, агхақәа иалыркаауа ириашалароуп, уаҳа урҭ ицәымцарц иҽазишәалароуп.