Адунеизегьтәи аԥсуа-абаза конгресси ауаажәларратә еиҿкаара «АМЧ-и» ақыҭа школқәа ирҭоу ахәыҷқәа иддырбоит аҭоурыхтә ҵакы змоу Аԥсны аҭыԥ ԥшӡарақәа.
Адунеизегьтәи аԥсуа-абаза конгресс ауаажәларратә еиҿкаара «АМЧ» алархәны еицаԥшьыргеит апроект «Ашьҭра», уи аҳәаақәа ирҭагӡаны ақыҭа школқәа рҵаҩцәа Аԥсны аҭоурыхтә ҭыԥқәа рахь иганы аекскурсиа рзымҩаԥыргалоит.
АААК Аҳәса рхеилакқәа рнапхгаҩы Гета Арӡынԥҳа еиҭалҳәеит апроект аидеиа зызцәырҵыз ауаажәларратә еиҿкаара «АМЧ» ахантәаҩы Алиса Ԥачалиа шлакәу, лара Аконгресс иатәу Аҿарацәа рхеилак далоуп. Аконгресс азы апроект «Ашьҭра» еиҳарак хықәкыс иамоуп – Аԥсны ақыҭақәа рҿы иҟоу АААК аҭыԥантәи аҟәшақәа активла рымадара, избанзар акоронавирустә пандемиа аамҭазы ҳтәылаҿы иалагалаз аԥкрақәа ирыхҟьаны аҭыԥантәи аҟәшақәа ԥыҭрак русура аанкылатәхеит.
«Апроект иалархәхоит Очамчыреи Гәдоуҭеи араионқәа рҟынтә ахәыҷқәа. Насгьы ҳара ари апроект наҳагӡарц ҳгәы иҭоуп уажәраанӡа ҳусура иалаҳмырхәыцыз аҭыԥантәи ахеилакқәа адгаланы», – ҳәа азгәалҭеит Гета Арӡынԥҳа.
Лара еиҭалҳәеит апроект ишалагаз Афон Ҿыц ахь аекскурсиа амҩаԥгарала, хаҭалагьы ахәыҷқәа идырбан Анаҟәаԥиатәи (Аԥсаратәи) абааш (VII-тәи ашәышықәсазы Аԥсара ашьхараҿ иргылаз ахырӷәӷәарҭа – аред.). Раԥхьатәи аекскурсиа рзымҩаԥган Драндатәи абжьаратә школ аҵаҩцәа.
Ашколхәыҷқәа ашьыжь ианышьҭырхлак амҩан какалк ддыркуеит, нас аекскурсиа анхыркәшахалак аԥсабараҿы иртәаны апикник рзеиҿыркаауеит. Аҭоурыхтә ҭыԥқәа раҭаара адагьы апрограмма иалоуп аԥсуа милаҭтә хәмаррақәа, ахәыҷқәа рыԥсы анеиҭаркуа аамҭазы ихәмарыртә еиԥш.
«Ҳара ҳныҟәараҿы дҳацуп аинструктор, амилаҭтә хәмаррақәа рыԥҟарақәа ҳзеиҭазҳәо, уи иахәҭоу зегь аниҳәалак ашьҭахь ахәыҷқәа гәырӷьаҵәа ахәмарра иалагоит», - лҳәеит АААК Аҳәса рхеилакқәа рнапхгаҩы.
Алиса Ԥачалиа еиҭалҳәеит, напхгара зылҭо аиҿкаара «АМЧ» уаанӡагьы ари аҩыза апроект шымҩаԥнагахьаз Аграждантә еилазаара рыҿиаразы Аҟәатәи ацентр иҟанаҵаз афинанстә цхыраарала. Уажәазы Аконгресс иадҵаалеит.
«Ҳара ҳамч ала ас еиԥш иҟоу апроект дуқәа ҳзынагӡаӡом, убри аҟнытә Аконгресс ацхыраара ҳаҳәеит. Ҳара ҳус иазыразхеит, иаҳхаҵгылеит, анаҩс апроект маҷк аҟара адаптациа азуны аԥсҭазаара аларҵәарахь ҳаиасит. Ҳәара аҭахума, хадара злоу аиҿкааратә усқәа зегьы Аконгресс абӷа иқәлеит, аха ҳаргьы иҳалшо ала ацхыраара ҟаҳҵоит», - лҳәеит Ԥачалиа.
Лара лгәаанагарала, аҭоурыхтә ҭыԥқәа раҭаареи, аицыхәмаррақәеи, аԥсабара аԥшӡареи, архитектуратә баҟақәа иурҭо анырреи еицыланы «ахәыҷқәа рааӡараҿы ицхыраагӡа бзиахоит, насгьы Аԥсны аҭоурыхи акультуреи зеиӷьыҟам ала иаднаԥхьалоит».
Апроект адгылара арҭеит атуристтә наплакы «Аԥсуа Тур» аҟынгьы, уи аусзуҩцәа ахәыҷқәа рзы аекскурсиақәа мҩаԥыргоит. Афон Ҿыци Анаҟәаԥиатәи абааи рахь ашколхәыҷқәа рзы аекскурсиа мҩаԥигеит Сандро Ԥачлиа.
«Ҳара ари аус ҳадымгылар ауамызт. Аԥсны иаҭаауа асасцәа мҩаԥаҳгозар, ҳара ҳтәылауаа рзынгьы аныҟәарақәа мҩаԥаҳгалароуп, еиҳаракгьы аҭоурыхтә ҵакы змоу аҭыԥқәа рахь, ҳҭоурых ду аӡбахә еиҭаҳҳәалароуп. Ари патриотроуп, ҳара ҳаилазаарагьы абас еиԥш иҟоу аидеиақәа еснагь ирыдгыло ируакуп», – иҳәеит «Аԥсуа Тур» аусзуҩ.
Иара иҳацеиҩишеит ахәыҷқәа аус рыцура инаҭаз ацәаныррақәа: иажәақәа рыла, ашколхәыҷқәа азҿлымҳара ду аарԥшны аекскурсиа аматериал иазыӡырҩуан.
«Ахәыҷқәа абри зегьы иахысуеит рышколтә программа аҳәаақәа ирҭагӡаны, аха ахҭысқәа ахьымҩаԥысуаз аҭыԥ аҿы уҟаны аҭоурых ануаҳауа, аматериал еиҳа аинтерес аҵалоит, еиӷьынгьы игәнукылоит», - ҳәа иԥхьаӡоит Сандро Ԥачлиа.
Дранда иҟоу АААК аҭыԥантәи ахеилак ахантәаҩы, Драндатәи ашкол адиректор Мзиа Ҵәыџьԥҳа иазгәалҭеит ас еиԥш иҟоу аусмҩаԥгатәқәа иахьынӡауа лассы-лассы еиҿкаалатәуп ҳәа, избан акәзар урҭ рыбзоурала ахәыҷқәа рыԥсадгьыл азгәыбылра еиҳахоит, уи иамоу аҭынха беиа иаҳа иахӡыӡаалоит.
Арҵаҩы еиҭалҳәеит лҵаҩцәа рҟынтә аӡәырҩы раԥхьаӡа акәны Анаҟәаԥиатәи абааш ишаҭааз, абри аныҟәара акыраамҭа ргәалашәараҿы ишаанхогьы агәра лгоит.
«Иҭабуп ҳәа расҳәоит абри апроект аиҿкааҩцәа зегьы. Ари даара акырзҵазкуа ус бзиоуп, ахәыҷқәа ирбаз-ираҳаз зегь ргәаԥхеит, ргәы иҭымҵәо иҟоуп», – лҳәеит ашкол адиректор.
Баграт Ҭарба 15 шықәса ихыҵуеит. Иара Аԥсны диит, ара дынхоит, аха Анаҟәаԥиа уажәаԥхьа имаацыз дреиуоуп. Аныҟәараан Баграт ихала АААК акорреспондент дааидтәалан изеиҭеиҳәеит иибо шаҟа игәы ианырыз.
«Иблахкыгарҭоуп ара. Аекскурсиа амҩаԥгаҩ иаҳзеиҭеиҳәоз зегьы ак саҩымшәандаз ҳәа сазыӡырҩуан. Иҭабуп идуӡӡаны Адунеизегьтәи аԥсуа-абаза конгресс, абрахь ҳааиртә еиԥш алшара ҳзаԥызҵаз», – иҳәеит аҷкәын.
Жәаха шықәса зхыҵуа Олесиа Шьоууаԥҳагьы раԥхьаӡа акәны Анаҟәаԥиатәи абааш лбеит, иара убас раԥхьаӡа акәны аԥсуа милаҭтә хәмаррақәа дрылахәын.
«Аекскурсиа ашьҭахь адәҳәыԥш аҿы апикник ҳаман. Уаҟа ҳахәмаруан, аԥсуа хәмаррақәагьы ҳдырбеит, ҳхы рылаҳархәит. Сара даара исгәаԥхеит урҭқәа!» - лҳәеит Олесиа.
Ашкол аҵаҩы Асҭанда Адлеиԥҳа амҩа иахьынӡаныз аекскурсиа апрограмма зҿлымҳарала дазыӡырҩуан, дҿаԥхаҿаччо, аныҟәара лгәы ишахәо мҩашьо. Аекскурсиа амҩаԥгаҩ ииҳәоз зегь гәнылкылар лҭахын ҳәа ҳалҳәеит лара нас.
«Иҿыцны издырыз, еилыскааз рацәоуп. Сыԥсҭазаараҿы иреиӷьу амшқәа ируакуп ари амш!» - лҳәеит Асҭанда.
Апроект «Ашьҭра» ф-етапк рыла имҩаԥысуеит. Етапцыԥхьаӡа аҳәаақәа ирҭагӡаны Аԥсны ақыҭақәа рышколхәыҷқәа аинтерес зҵоу аекскурсиа рзеиҿкаахоит. Апроект хыркәшахоит цәыббра12 рзы.
шәҭалароуп, ма шәыҽҭажәыҩроуп.