Адунеизегьтәи аҧсуа-абаза конгресси Аҧсуа драматә театри еицымҩаҧырго апроект иабзоураны, ашколхәыҷқәа аӡәырҩы ирзаатит акультуреи аҟазареи рдунеи ахь амҩа. 2026 шықәсазы атеатр сасцәаны раҧхьа иаҭааит Тамшьтәи ашколхәыҷқәа.

Апрограмма хацыркын акультуратә хәышҭаара аҭоурых инарҵауланы аиҭаҳәарала. Ашколхәыҷқәа рзы аинтерес зҵоу аекскурсиа мҩаҧылгеит Аҧсны Зҽаҧсазтәыз ажурналист, актриса Елеонора Коӷониаҧҳа. Лара ахәыҷқәа ирзеиҭалҳәеит атеатртә етикет ишықәныҟәалатәу, артист иџьабаа пату шақәҵатәу, азал аҿы аҭынчра аилагара шыҟамло.

Ахәыҷқәа ҷыдала агәахәара рнаҭеит акулисанҭыҵтә уадақәа рҭаара. Дара иреилдыркааит аспектакль ақәыргыларазы ҳәоуеиқәшәала аус шеицыруа арежиссиорцәа, агримҟаҵаҩцәа, арлашаҩцәа, адекораторцәа. Ахәыҷқәа хаҭала атруппа алахәылацәа ирыҿцәажәеит, асценатә џьабаа алҵшәа лабҿаба иалаҧшит.

«Атеатр аҿы даара угәы иаахәаша атмосфера анырра ҳнаҭеит. Асасцәа ҳзы имҩаҧыргеит аекскурсиа – атеатр актиорцәа, аспектакль ақәыргылаҩцәа, агримҟаҵаҩцәа иаҳзеиҭарҳәеит иҿыцу, аинтерес зҵоу рацәаны. Нас абуфет аҿы ачеиџьыка ҳадыргалеит. Дук мырҵыкәа аспектакль ахаҭагьы алагеит. Ари ахәылҧаз ацәаныррақәа рацәаны иаҳзааннажьит. Избаз-исаҳаз схашҭуам, – ҳәа лцәаныррақәа ҳацеиҩылшеит аҵаҩцәа руаӡәк.

Ақыҭа школхәыҷқәа рзы ари аныҟәара баша гәырҿыхагам, рылаҧшҳәаа арҭбааит.  Аиҿкааҩцәа инаҵшьны иазгәарҭоит: апроект хықәкыс иамоуп амилаҭтә театр ахь аинтерес ашьҭыхра.

«Аиҧш зеиҧшу аекскурсиа – ҳара ҳзы ҧыжәаратә лшароуп. Атеатр бзиа избо ауаа рацәаҩуп, аха уи адунеи маӡа лабҿаба зегьы ирзаатуам. Сгәы иаахәоит ҳхәыҷқәа ари аҩыза алшара хьрымоу. Аҧсуа театр — ҳажәлар зегьы рзы ҭынха дууп», — ҳәа азгәалҭеит арежиссер Мадина Аргәын.

Апроект анагӡараан иҟарҵаз ацхырааразы Аконгресс агәыҧ иҭабуп ҳәа рарҳәоит Аҧсуа драматә театр анапхгареи аколлективи, аиҳабы Хьыбла Мықәба аҧхьа днаргыланы.