АААК аҭыԥантәи аҟәша Ахеилак аԥҵан Адунеизегьтәи аԥсуа-абаза конгресс ахаҭарнакцәеи Гагра араион ауааԥсыреи реиԥылараан.
Саид Барганџьиа
Адунеизегьтәи аԥсуа-абаза конгресс ахаҭарнакцәа Гагра араиона ауааԥсыра ирԥыланы ирзеиҭарҳәеит аиҿкаара аусуреи, уи хықәкыс иамоуи ртәы ахаша, жәабран 27 рзы. Аиԥылара ахыркәшамҭаз Гагра иартын АААК аҭыԥантәи аҟәша Ахеилак, уи дахагылеит Гагра араион ахада ихаҭыԥуаҩ Геннади Ҵәыџьба.
Геннади Ҵәыџьба иазгәеиҭеит Гагра ауааԥсыра Аконгресс аусурахьы аинтерес ду шаадырԥшыз, ирацәаҩны агәаҳәара роуит Аҭыԥантәи аҟәша ахеилак иалаларц, иара убас Аконгрессгьы иахәҭакхарц.
«Алҵшәа бзиақәа ҳауп ҳәа ҳақәгәыӷуеит. Аконгресс аидеиақәа ацеиҩызшо ауаа ахьынӡауа ирацәаҩны иҳадҳаԥхьалар ҳҭахуп. Абызшәеи адемографиеи рырҿиара иазку апроектқәа еицынаҳагӡарц ҳгәы иҭоуп. Ҳара ҳапроблемақәа атәылаҿы зегьы ирымоу иреиԥшуп. Ҳрызхәыцлоит, рыӡбаразы аус еицаҳаулоит», – иҳәеит иара.
Гагратәи аҭыԥантәи аҟәша Ахеилак далалеит иара убас зхы иақәиҭу ақәԥаразы азыҟаҵаҩ Асҭамыр Арсҭаа, иара иԥхьаӡоит Аконгресс аидеиақәа Аԥсны араионқәа зегьы рҟны адгылара рымазароуп ҳәа, иахәҭангьы ибоит ауаажәларра еидгыланы русеицура, аԥсҭазаара бзиа аагаразы.
«Ҳаигәырӷьоит Аконгресс аҟәша уажәшьҭа ҳара ҳҿгьы иахьаатыз. Иахьа иҳаҳаз ари аиҿкаара аусурақәеи ахыдҵақәеи ҳарзыразуп, гәыкала ҳрыдгылоит. Сгәыӷуеит, ҳақалақь, ҳтәыла иахәаша хра злоу аусқәа ҳзыҟаҵап ҳәа», – иҳәеит Арсҭаа.
Гагратәи АААК аҟәша Ахеилак иалалаеит 14-ҩык ауааԥсыра: Асҭан Агрба, Слава Сақаниа, Ҭемыр Ҭаниа, Феликс Џьыкырба, Алла Беиа, Мадина Аҟәысба, Едгар Папба, Амина Арсҭаа, Рабсҭан Барцыц, Закан Агрба, Ҭенгиз Габуниа, Самсон Демырџь-иԥа.
Гагра ауааԥсыра рԥылара ихы алаирхәит Аконгресс Иреиҳаӡоу ахеилак алахәыла, Аԥсуаҭҵааратә институт адиректор Арда Ашәба. Иара еизаз рҿаԥхьа дықәгыланы ирзеиҭеиҳәеит Аконгресс аҿаԥхьа иқәнаргылаз ахықәкқәа рынагӡара аҵак ду шамоу аԥсуа-абаза милаҭ зегьы рзы.
«Ҳара зегьы, жәларык еицатәу, аидгылара ҳамазароуп, ҳаицызароуп, еиҳаракгьы иахьа, аимадаразы алшарақәа рацәаны ианыҟоу. Ҳҭоурых аҿы иҟаз, ҳаицәыхаразтәуаз агхақәа зегь азгәаҳҭароуп. Ҳара (аԥсуааи ашәуааи – аред.) ҳмаҷыҩӡам, аха ҳаизакызароуп. Ҳбызшәақәа реиқәырхаразы иҳалшо зегь ҟаҳҵароуп. Ҳаԥхьаҟа аусура рацәаны ишьҭоуп, агәҭакқәа маҷымкәа иҳамоуп», – иҳәеит иара.
Гагра ауааԥсыра рԥылара иалахәын Аконгресс ауснагӡаратә маӡаныҟәгаҩ Инар Гыцба, АААК Аҳәса рхеилакқәеи Аҿар рхеилакқәеи рнапхгаҩцәа Гета Арӡынԥҳаи Леван Торчуеи, Аконгресс аинфопортал апресс-маӡаныҟәгаҩ Саид Барганџьиеи, иҭзыжьуа аредактор Изольда Ҳагԥҳаи, Аԥсны иҟоу ИАЕ «Алашара» ахаҭарнак Алиас Аиба, Иреиҳаӡоу ахеилак алахәыла Инвер Алшәындба.
Адунеизегьтәи аԥсуа-абаза конгресс ахаҭарнакцәеи Гагра араион активистцәеи реиԥылара аԥшьбатәиуп аиԥш зеиԥшу Аԥсны араионқәеи ақалақьқәеи руааԥсыра рԥыларақәа рыбжьара. Арҭ аиԥыларақәа рҳәаақәа ирҭагӡаны Адунеизегьтәи аԥсуа-абаза конгресс ахаҭарнакцәа аиҿкаара аусура ахықәкқәеи ахыдҵақәеи ртәы еиҭарҳәоит, иара убас инарыгӡахьоу иазыԥхьагәаҭоу апроектқәа рыӡбахә рҳәоит. Абас еиԥш аиԥыларақәа мҩаԥгахоит атәыла араионқәа зегьы рҿы Аконгресс ахь алахәылацәа ҿыцқәа радыԥхьаларазы, уи аусура ралархәразы.
шәҭалароуп, ма шәыҽҭажәыҩроуп.