Селма Базҧҳа

Аконгресс агәыҧи «Асоциалтә ҧшьгамҭақәа руаажәларратә центри» еицымҩаҧыргоз мҽхакыҭбаалатәи аусура хдыркәшеит. Аусеицура шьаҭас иаман асоциалтә проектҟаҵара иазкны Адунеизегьтәи аҧсуа-абаза конгресс хышықәса рыҩнуҵаҟа имҩаҧнаго апроект. Апрограмма иаҵанакуеит адыррақәа рырҳара иазку атренингқәеи урҭ активла рхархәареи. Аусеицура аформа ҿыц аҳәаақәа ирҭагӡаны ҧшьыџьара Аҧсны ақыҭашколқәа рҿы ауаажәларратә ҭыҧқәа аадыртит.

Аидеиа аҟнытә анагӡарахь

Аиҿкаарақәа русеицура ахы ыҵнахуеит Аҧсны Аҳәынҭқарра Ауаажәларратә палатаҟны ианеибадырыз инаркны.

«Иавтономтәу икоммерциатәым аиҿкаара «Асоциалтә ҧшьгамҭақәа руаажәларратә центр» ахада Светлана Моисеева Ауаажәларратә палата дадҵаалеит Аҧсны аус зуа икоммерциатәым аиҿкаарақәеи имҩаҧысуа асоциалтә проектқәеи рыӡбахә еилылкаарц. Уи анаҩсан Урыстәыла Ахада игрантқәа рфонд имҩаҧнагоз аицлабра ҷыдахь арзаҳал аларҵеит. Афонд аҟнытә афинанстә цхыраара анҳау, апроект анагӡара ҳалагеит», - лҳәеит асоциалтә ҿиареи, аҵареи, агәабзиарахьчареи рзы АААК аҟәша анапхгаҩы Изольда Ҳагҧҳа.

Аусеицура иазкыз аидеиа активла дадгылеит АААК Иреиҳаӡоу ахеилак ахантәаҩы Мусса Егзакь.

«Урыстәыла Ахада игрантқәа рфонд имҩаҧаҳго апроект иахьадгылаз иаҳнарбоит Аконгресс агәыҧ аусура аҩаӡара шыҳараку. Ари аҩыза адгылара ҳусушьа алҵшәа аанарҧшуеит, Аҧсны ҧхьаҟагьы аиҭакра бзиақәа рымҩаҧгара шалшо. Иара убасгьы аҵак ду амоуп ари апроект абзоурала Урыстәылеи Аҧсни рактивистцәа аусеицура иахьалагаз, аиашьаратә еизыҟазаашьақәа зыбжьоу ҩ-тәылак рҿы аусура ахырхарҭа ҿыцқәа хьцәырҵыз», - ҳәа азгәеиҭеит Егзакь.

Ахырхарҭа рацәа зҵакуаз ари апроект нарыгӡон 2025 шықәса хәажәкырамз поа инаркны жьҭаарамзанӡа. Хадара злоу аҭыҧ ааннакылон аҿартә ҧшьгамҭақәа адгылара рыҭара. Ҳаамҭазтәи ауаажәларратә ҭыҧқәа аадыртит Шьашькәара, Уақәым, Ҧақәашь, Мгәыӡырхәа.

Аҿар рыҿиареи абаҩрҵәыреи рзы АААК аҟәша аспециалист Есма Кәыҵниаҧҳа далацәажәеит ашколхәыҷқәеи амодераторцәеи русеицура.

«Адунеизегьтәи аҧсуа-абаза конгресс асоциалтә проектҟаҵара иазку атренингқәа еиҿнакаауеижьҭеи абар уажәшьҭа ҩышықәса ҵуеит. Ари аамҭа иалагӡаны аа-школк ҳарҭааит. Иавтономтәу икоммерциатәым аиҿкаара «Асоциалтә ҧшьгамҭақәа руаажәларратә центри» АААКи русеицура абзоурала 2025 шықәсазы апроект аусура амҽхак арҭбааит. Апроектҟаҵара иазкыз атренингқәа рымҩаҧгараан ирыӡбеит ауаажәларратә ҭыҧқәа аадыртырц. Уаҟа ашколхәыҷқәа ирхыргалоит аурокнҭыҵтә аамҭа», - лҳәеит Кәыҵниаҧҳа.

Ауаажәларратә ҭыҧқәа рҿы имҩаҧыргалоит атренингқәа, ахәыҷқәа рыҧсы ршьалоит. Иаахәоуп акондиционерқәа, астолқәа, аҟәардәқәа, астеллажқәа, астолтә хәмаррақәа, апроектор, аноутбук, атәарҭа татақәа. Ашколқәа урҭ зегьы рхы иадырхәо иалагахьеит.

Икоммерциатәым аиҿкаара «Асоциалтә ҧшьгамҭақәа руаажәларратә центр» аиҳабы Светлана Моисеева ари аус дазааҭгыланы далацәажәеит.

«Аханатә ҳара иаҳгәиҭан ауадақәа стандартла реиқәыршәара. Аха аҵаҩцәеи арҵаҩцәеи ҳанрыҿцәажәа еилаҳкааит дара ирҭаху маҷк ишыхазу. Усҟан иҳаӡбеит раҧхьатәи ҳаплан ҳацәхьаҵырц. Аҧсахрақәа дрықәшаҳаҭхеит атәыла Ахада игрантқәа рфонд аҟны ҳапроект хылаҧшра азҭо амаҵурауаҩ. Ари иалҵшәаны ашколқәа ироуеит дара ирҭахцәҟаз, иаҳҳәап: асплит-системақәа, арҿиара иацхраауа ахәмаргақәа, уҳәа», - лҳәеит Моисеева.

Ауаажәларратә ҭыҧқәа реиқәыршәара инаваргыланы ашколқәа рҿы имҩаҧыргон асоциалтә проектҟаҵара иазкыз атренингқәа. Иаиааиз агәыҧқәа апроектнагӡараҿы ацхыраара роуит. Урҭ реиҳарак зызкыз аспорттә маҭәахәқәа раахәара акәын.

Хыхь еиқәыҧхьаӡоу аҧшьгамҭақәа ирыцлеит егьырҭ аусурақәагьы. Ус, Аацы ақыҭа аҟнытә апроект алахәҩы иҟарҵаз аҳәара инақәыршәаны, рышкол абиблиотека ҳамҭас иарҭеит ашәҟәқәа. Дәрыҧшьтәи ашьапылампылтә гәыҧ акәзар, ирзырӡахит ақыҭа ахьӡи рхатә дыргеи зну амаҭәа.

Аусеицуратә активра

Аусеицура аҳәаақәа ирҭагӡаны еиҿкаан егьырҭ аусмҩаҧгатәқәагьы. Ус, Аҧсни Ростовтәи атәылаҿацәи рыҟнытә аиҿкаарақәа рыбжьара имҩаҧысит аиҧыларақәа ҩба. Аиҿкаарақәа агранттә цхыраара аиуразы ирымоу аҧышәа еимырдеит. Аусмҩаҧгатәқәа еиҿыркааит АААК Аҟәатәи аофис апресс-центр аҿы.

«Аҧснытәи ауаажәларратә аиҿкаарақәеи Ростовтәи атәылаҿацә аҟнытә икоммерциатәым аиҿкаарақәеи рхаҭарнакцәа еибаҳардырит. Ҳгәыӷуеит урҭ реигәныҩра ҧхьаҟа алҵшәа бзиақәа аанарҧшып ҳәа», - лҳәеит икоммерциатәым аиҿкаара «Асоциалтә ҧшьгамҭақәа руаажәларратә центр» аиҳабы Светлана Моисеева.

Даҽа усуратә хырхарҭоуп Цандрыҧшьи Аҟәеи еиҿкаау аиҭашьақәыргыларатә центрқәа хылаҧшра зырҭо рзы ахәыҷқәа рыхьчара Амшныҳәа амҩаҧгара.

Аиҿкааҩцәа Тҟәарчалгьы иаҭааит. Абарҭ х-қалақьк рыҟны аниматорцәа злахәыз ашоу мҩаҧыргеит, ахәыҷқәа ирырҭеит аҳамҭақәа.

Аҵареи, асоциалтә активреи, агәабзиарахьчареи рзы АААК аҟәша аспециалист Наур Хышба апартнерцәа иҭабуп ҳәа реиҳәеит.

«Аҵаҩцәа апроекттә усура ралагалара рхәыцшьеи, рҟазареи, рҧышәеи еизнарҳауеит. Аконгресс агәыҧи иавтономтәу икоммерциатәым аиҿкаара «Асоциалтә ҧшьгамҭақәа руаажәларратә центри» шықәсык инацны аус адырулоит апроект «Иавтономтәу аиҿкаарақәа рызҳарҭа: Аҧсны». Ари аусеицура иалнаршеит АААК аусура амҽхак аизырҳара. Апроект аҳәаақәа ирҭагӡаны иҳалшеит аус бзиақәа рынагӡара. Ҳколлегацәа иҭабуп ҳәа расҳәоит аҭыҧантәи аҭахрақәа иахьреиҷаҳауазы. Даҽакала иаҳҳәозар, дара иҟарҵаша ӡбаны имааӡеит, иааны иаҳҭаху иазҵааит, изларылшоз ала иҳацхрааит», - иҳәеит Хышба

Аҧсны Аҳәынҭқарра Ауаажәларратә палата аилатәара: аусеицура алҵшәақәа

Имҩаҧгаз аусеицура алҵшәақәа ргәаҭаразы аиҿкаарақәа рхаҭарнакцәа ҩымчыбжь ашколқәа ирылсны игәарҭон. Алҵшәақәа цәырыргеит аусеицура ахы хьыҵнахыз - Аҧсны Аҳәынҭқарра Ауаажәларратә палатаҟны.

Моисеева Аҧснытәи лколлегацәа иҭабуп ҳәа ралҳәеит асасдкыларазы, апроект аусура ианалагоз ацхыраара хьыҟарҵаз азы. Лара инаҵшьны иазгәалҭеит аконкурс аҿы азеиҧш лҵшәа бзиа зыбзоуроу русеицура шакәу.

«Ҳара аусеицура ҳаицалагеит - ҳаицаиааит! Аицлабра иалахәын 68 еиҿкаара, урҭ рыҟнытә ҳара ҳналаҵаны 8 еиҿкаарак афинанстә цхыраара роуит. Агәра ганы сыҟоуп ҳиааира шалымшоз, ҳзықәгәыӷуа апартнер дҳамамзар», - ҳәа азгәалҭеит лара.

Аиҧылара хыркәшо, апартнерцәа иҭабуп ҳәа еибырҳәеит. Иқәгылоз инаҵшьны иазгәарҭеит алҵшәақәа зыбзоуроу ҳәоуеиқәшәарала аусеицуреи еиҧшу ахәыцшьеи роуп ҳәа. Аганқәа еицҿакны иақәшаҳаҭхеит анаҩсгьы аусеицура шаҭаху, асоциалтә ҵакы змоу апроектқәа ишрыцырҵо.

Асоциалтә проектҟаҵара ашьаҭақәа ирызку апроект — АААК хадара злоу апроектқәа ируакуп. 2024 шықәсазы апроект адгылара арҭеит Аҿари аспорти русқәа рзы Аҳәынҭеилакы. 2025 шықәса алагамҭазы Аконгресс агәыҧ агеографиатә ҳәаақәа ырҭбааны, аформат ҿыц ахь ииасит. Усҟан АААКи Урыстәылатәи Афедерациа, Ростовтәи атәылаҿацә, Каменск-Шахтинск ақалақь аҟнытә иавтономтәу икоммерциатәым аиҿкаара «Асоциалтә ҧшьгамҭақәа руаажәларратә центри» аусеицуразы аиқәшаҳаҭра рыбжьарҵеит. Аус еицызуаз аиҿкаарақәа ақыҭа школқәа рыҟны имҩаҧыргеит атренингқәа. Иара убасгьы Аҧсны ақыҭатә школқәа ҧшьба ироуит ҳаамҭазтәи азыҳәарақәа ирықәшәо ауаажәларратә ҭыҧқәа. Уи адагьы қәҿиарала имҩаҧыргеит аҭыҧантәи аҿартә ҧшьгамҭақәа жәпакы.