Амилаҭ-спорттә хәмарра «Аимҵакьачара» азы атурнир аиааира агаразы еиндаҭлон х-командак.
Аетнопарк «Аԥсны» имҩаԥысит амилаҭ-спорттә хәмарра «Аимҵакьачара» (регби акыр иеиԥшуп) азы атурнир. Ахәмарра аԥҟаррақәа рыла, акомандақәа ркаԥданцәа лабала ауапцәа-мпыл иасуеит. Убри аан дасу иҽазишәоит икомандахь иршәырц. Ампыл зкыз амбанӡа анеира иҽазишәоит егьи акоманда алахәылацәа дрымпыҵамшәакәа.
Аԥсуа-абаза конгресс ҩышықәса раԥхьа амилаҭ хәмаррақәа рзы апроект хацнаркит. Абри аамҭала апроект аҳәаақәа ирҭагӡаны Аԥсны араионқәа рҿы имҩаԥысуан аҽазыҟаҵарақәеи аицлабрақәеи. Сынтәа апроект еиҳагьы аҽарҭбааит.
«Ҳара даара ҳаигәырӷьоит аицлабрақәа абри аформат ала, абасеиԥш мҽхакы ҭбаала иахьымҩаԥысуа. Агәра аагоит ҽааны атурнир ишалахәхо еиҳагьы Аԥсны араионқәеи ақыҭақәеи. Аҿар рыбжьара амилаҭ спортхкқәа раларҵәара Аконгресс аусура ахықәкы хадақәа иреиуоуп», - иҳәеит Аҟәа иҟоу АААК арегионалтә ҟәша анапхгаҩы Ҭемыр Рекәаа.
Атурнир ацеиҿкааҩыс иқәгылеит Аҿари аспорт русқәа рзы аҳәынҭқарратә еилакы. Аицлабрақәа рымҩаԥгараҿы ацхыраара ауит аетнопарк «Аԥсны».
«Ахәмаррақәа рымҩаԥгара аҵак ду аманы иҟоуп. Акы – уи гәабзиароуп, мчхароуп, ласроуп, лшароуп. Уи адагьы, ари аҩыза ахәмарра аҿар амилаҭ традициақәа ирыднаҳәалоит. Ҳгәы иҭоуп амилаҭ спортхкқәа рфедерациа аԥҵара. Уажәы аҽазыҟаҵаратә усурақәа мҩаԥаагоит», - иҳәеит Аҳәынҭеилакы аҿартә политика аҟәша аиҳабы Идрис Кара-Осман-оглы.
Атурнир алагеит аиҿкааҩцәа рықәгыларала, анаҩс иқәгылеит ахәыҷтәы ансамбльқәа «Адаци» «Адаули» рлахәылацәа. Аицлабрақәа ирылахәын Лыхны, Ҷлоу, Аҟәатәи абжьаратә школ №5 рҟынтәи аҵаҩцәа.
«Ахәыҷқәа сгәы рылаҟоуп. Ҷлоутәи акоманда хәмаруеижьҭеи акырҵуеит. Ибзиангьы ихәмаруеит. 5-тәи ашкол акоманда алхратә турнир аангьы рхы бзианы иаадырԥшит. Лыхнытәи акоманда иалахәуп Бамборатәи абжьаратә школ аҵаҩцәагьы. Даара ибзианы ихәмаруеит», - ҳәа азгәеиҭеит АААК Аҿар реизҳареи абаҩрҵәыреи рыҟәша анапхгаҩы Валери Берзениа.
Аицлабрақәа реихшьаалала, аиааира агеит Ҷлоу акоманда, аҩбатәи – Аҟәатәи 5-тәи ашкол, ахԥатәи –Лыхны акоманда. Атурнир алахәылацәа иранашьан ахраҿақәа, амедалқәа, аҳаҭыртә шәҟәқәа.
шәҭалароуп, ма шәыҽҭажәыҩроуп.