Адунеизегьтәи аԥсуа-абаза конгресс Аҿар рыҿиареи абаҩрҵәыреи рыҟәшеи амузыкант, ашәаԥҵаҩы Абзагә Марыхәбеи еицымҩаԥыргоз агәаҭаратә музыкатә проект аихшьаалақәа ҟарҵеит.
Шьазина Бганԥҳа
Амузыкатә проект аиҿкааҩцәеи алахәцәеи реиԥылара мҩаԥысит АААК Аҟәатәи аофис аҟны. Ари аиԥылара рхы аладырхәит И. Е. кортуа ихьӡ зху Ажәлар рҟазара ареспубликатә центр адиректор Нури Кәарҷиа, ашәаҳәаҩ Фрида Берзениа, ашәаԥҵаҩ Ҭемыр Агрба, амузыкант Алхас Марколиа, Гәдоуҭатәи ахәыҷтәы вокалтә студиа «Voice» аҵаҩцәа, иара убас Гал араион ашколхәыҷқәа.
Апроект хацыркын 2023 шықәса жәабранмзазы. Уи алахәцәас иҟалеит абаҩхатәра қәыԥшқәа реиԥш, аԥсуа естрадаҿы зыхьӡ бзианы ирдыруа артистцәагьы: НТВ аҟны имҩаԥысуаз Жәларбжьаратәи ахәыҷтәы вокалтә конкурс "Ты супер" аиааирагаҩ Валериа Адлеиԥҳа, ашәаҳәаҩ Мадина Кәарцхьиаԥҳа, "Аиҳәшьцәа Берзениаа" адует иалахәу ашәаҳәаҩ Фрида Берзениа, ашәаҳәаҩ Артиом Качараа, амузыкатә шоу "Apsny Star" алахәыла Иракли Џьумуҭиа.
Апроект мҩаԥысуан амастер-классқәа раҳасабала Гәдоуҭа, Гал, Гагра, Очамчыра. Иара аԥышәаратә ҟазшьа шамазгьы, аиҿкааҩцәа ирылшеит аҿар рыҟнытә азҿлымҳара ду аиура, рҿаԥхьа иқәгылаз ахыдҵақәа рынагӡара, абаҩхатәра злоу ақәыԥшцәа раарԥшра. Апроект аҳәаақәҵаҩ, АААК Аҿар рыҿиареи абаҩрҵәыреи рыҟәша аиҳабы Валери Берзениа иазгәеиҭеит абас иҟоу аусмҩаԥгатәқәа рыла аҟыбаҩ злоу аҿар амузыкаҿы раԥхьатәи ршьаҿақәа шыҟарҵо.
"Ари макьана ԥышәак аҳасабала изыԥшьаҳгаз усуп. Аха ус шакәугьы шәҩык ауаа адҳаԥхьалеит Аԥсны араионқәа ԥшьба рҟынтә. Ҳара иаҳбар акәын шаҟа иаҭахны иҟоу абас еиԥш иҟоу аусмҩаԥгатәқәа, аԥсуа музыкатә индустриаҿы ахьӡ ҿыцқәа ҳазцәыргару ҳәа. Аҭак ҳауит иаразнакала, раԥхьаӡатәи ҳаиԥылараҿы иааиз ахәыҷқәа рыбла цырцырқәа ҳанырхыԥшыла. Ҳәара аҭахума, иааиуа ашықәсазы зегь ҳамчқәа еибыҭаны апроект анагӡара ҳҽазаҳшәоит", - иҳәеит Берзениа.
Аиԥылараҿы еизаз идырбан авидеороликқәа хԥа, астудиа «Voice» авокалистцәа ҿарацәа злахәны иҭыхыз. Ҩ-ашәак - автортә ашәақәан.
Гал араион ашколхәыҷқәа злахәугьы даҽа роликк аҭыхра рҽазыҟарҵоит уажәы. Ароликқәа рыбжьы арежиссиорс дыҟоуп Абзагә Марыхәба, аоператор - Сергеи Қаџьаиа. Аиԥылара алахәцәа русеицуразы дасу ргәаанагарақәа еибырҳәеит, апроект иацҵахап ҳәагьы агәыӷра аадырԥшит.
"Ахәыҷқәа реизҳара, рбаҩхатәра арҿиара иазку зегьы излауала ацхыраара аҭалатәуп, ҳәарада. Ари апроект анагаӡараҿы хадара злоу акоуп асистематә знеишьа ашьақәыргылара. Усҟан дарбанзаалак ахәыҷы алшара иоуеит ибжьы ауаа ираҳартә ахаарԥшра", - иҳәеит АААК Иреиҳаӡоу Ахеилак алахәыла Нури Кәарҷиа.
"Мусса Егзакьи иара еидикылаз акомандеи аԥхьа инаргыланы иҭабуп ҳәа расҳәоит абаҩхатәра злоу ҳҿар реизҳазыӷьара иазааԥсо зегьы", - ҳәа ациҵеит иара.
Адунеизегьтәи аԥсуа-абаза конгресси Абзагә Марыхәбеи еицымҩаԥырго амузыкатә проект иацҵахоит ҳазҭало 2024 шықәса азыҳәангьы.
шәҭалароуп, ма шәыҽҭажәыҩроуп.