Лента событий ВААК
Ашколқәа ҩба рыҟны АААК имҩаҧнагеит аекологиатә тренинг
Аҵареи, асоциалтә активреи, агәабзиарахьчареи рзы АААК аҟәшеи ААУ аекологиеи аҧстәқәа рморфологиеи ркафедра аметодист Маиа Цыбулевскаиеи иацырҵоит ашколқәа рҿы имҩаҧысуа аекологиатә тренингқәа. Изаамҭанытәиу аинтерактивтә лекциа мҩаҧысит Тҟәарчал ақалақь абжьаратә школ N 1, иара убасгьы Беслахә ақыҭан.
Маиа Цыбулевскаиа ахәыҷқәа ирзеиҭалҳәеит аекологиа закәу, аҧсабареи уи алшарақәеи шыхьчатәу, ауаҩы аҧсабара иаиҭо анырра зеиҧшроу, насгьы иаҳзеиҧшу аҩны - апланета Адгьыл аиқәырхаразы иҟаҵатәу.
Ашколхәыҷқәа активла адискуссиа иалахәын, ргәаанагара иалацәажәон. Аиҧылараҿы ирылацәажәеит аҳауа аҟьашьра, ацәынхақәа аус рыдулара, аиаҵәара ахшьаара, апестицидқәеи ахимиатә рҵәыгақәеи рхархәара уҳәа Аҧсны ақыҭақәеи ақалақьқәеи рҿы иаҳҧыло егьырҭ аекологиатә проблемақәа.
