Лента событий ВААК
Апроект «Ирӡтәым» аҳәаақәа ирҭагӡаны АААК имҩаҧнагеит изаамҭанытәиу алекциа
Адунеизегьтәи аҧсуа-абаза конгресси ААУ аҧсуа бызшәа акафедра арҵаҩы Инна Џьугелиаҧҳаи иацырҵоит апроект «Ирӡтәым». Апроект ахықәкы - ахәдурақәа рсистема арӷәӷәара, аҧсуаа рдоуҳа-цәаҩашәатә ҧсҭазаареи, акультуреи, аҭоурыхи рганахь ала аҿар рыбжьара адыррақәа раларҵәара.
Изаамҭанытәиу алекциа мҩаҧыргеит Аҧснытәи аҳәынҭқарратә университет апедагогикатә факультет аҩбатәи акурс астудентцәа рзы. Аицәажәаратә формат змаз алекциа темас иаман Кавказ ажәларқәа рыкәашаратә ҟазара. Уи мҩаҧылгеит аҭоурыхтә ҭҵаарадыррақәа ркандидат, Аҧсны агуманитартә ҭҵаарақәа ринститут аетнологиа аҟәша аусзуҩы Асида Гәымҧҳа. Лара астудентцәа ирзеиҭалҳәеит Кавказтәи акәашарақәа рҭоурыхи рҷыдарақәеи, аамҭа цацҧхьаӡа ахореографиа аҽшеиҭанакуаз, урҭ аҧсахрақәа мзызс ирымаз.
«Ирӡтәым» - Адунеизегьтәи аҧсуа-абаза конгресси ААУ аҧсуа бызшәа акафедра арҵаҩы Инна Џьугелиаҧҳаи еицымҩаҧырго проектуп. Уи хықәкыс иамоуп аҧсуара ауаа рыларҵәара, Абаза жәлар рҵасқәеи рқьабзқәеи реиҭарҿиара.
