Адунеизегьтәи
аԥсуа-абаза
конгресс

АААК аҭыҧантәи ахаҭарнакра аҧшьгарала Приморсктәи абжьаратә школ аҧсуа бызшәа ауадаҿы икнарҳаит астенд ҿыц. Уаҟа иануп инарылукааша аҧсуа шәҟәыҩҩцәеи аҵарауааи. Астенд хәыда-ҧсада аҭыжьразы иҭабуп ҳәа раҳҳәоит аӡыргаратә агентра «Авантаж» аколлективи, уи анапхгаҩы Владимир Сельвиани. 

Иара убасгьы хықәкылатәи ацхыраара аиуит Гәдоуҭатәи 5-тәи ашкол: аҵараиурҭа иазаархәеит амузыкатә колонкеи амикрофони.

Адунеизегьтәи аҧсуа-абаза конгресси С. Ҷанба ихьӡ зху Аҧсуа драматә театри иацырҵоит «Атеатр аҿы ахәылҧаз» зыхьӡу апроект амҩаҧгара. Уажәазы уи рхы аладырхәит Приморсктәи абжьаратә школ № 1 аҵаҩцәа. 

Актриса, Аҧсны Зҽаҧсазтәыз артист Елеонора Коӷониаҧҳа аекскурсиа мҩаҧылгеит – атеатр аҭоурых дазааҭгылеит, аҧсуа ҟазараҿы хадара злоу аспектакльқәа дрылацәажәеит. Лара ахәыҷқәа ирзеиҭалҳәеит артистцәеи егьырҭ атеатр аусуҩцәеи рџьабаа пату шақәҵатәу, ақәыргыламҭа арбараан ахымҩаҧгашьа ҷыда шаарҧштәу.

Анаҩс ашколхәыҷқәа мҩахыргеит акулисақәа рышьҭахьҟа: атруппа иалахәу ирабадырит, аспектакль ақәыргылашьа еилыркааит, актиор изанааҭ иадҳәалоу адырра ҿыцқәа роуит. Ахәылҧаз ахҭыс хада аҳасаб ала иддырбеит арежиссер Алхас Шамба иқәиргылаз акомедиа «Мирандолина».

Атеатр аҿы ахәылҧаз хдыркәшеит акрыфарҭа аҭаарала, уаҟа асасцәа ачеиџьыка рыдыргалеит.

Аҿар рыҿиареи абаҩрҵәыреи рзы АААК аҟәшеи ААУ аҧсуа бызшәа акафедра арҵаҩы, аҧсуа етнолог, АААК ИА алахәҩы Марина Барцыцҧҳаи имҩаҧыргеит апроект «Ирӡтәым» иаҵанакуа алекциа. Алекциа мҩаҧысит Дырмит Гәлиа ихьӡ зху Аҟәатәи ашкол №4 аҟны. Алекциа атема: аҧсуаа рморал-цәаҩашәатә хымҩаҧгашьа, еизҳауа аҿар рааӡараҿы Аҧсуара иааннакыло аҭыҧ.

Алагаратә арратә ҽазыҟаҵаразы еиҿкаау апроект аҳәаақәа ирҭагӡаны аҭыҧантәи ахаҭарнакрақәа аус рыцура иазку АААК аҟәша имҩаҧнагеит изаамҭанытәиу аҭыҵра. Уажәазы апроект рхы аладырхәит Драндатәи абжьаратә школ аиҳабыратә классқәа рҵаҩцәа.

Апрограмма ҩ-етапк рыла ишьақәгылан. Аханатә ашколхәыҷқәа Аҟәа иҟоу архәҭақәа руак иаҭааит, уаҟа дара иддырбеит еиуеиҧшым абџьархкқәеи аибашьыгатә техникеи. Анаҩс ахысратә клуб ахь имҩахыҵит. Уаҟа аинструкторцәа имҩаҧыргеит атеориатә курс: иддырбеит абџьар акышьа, ирзеиҭалҳәеит ашәарҭадаратә ҧҟарақәа.

Уи ашьҭахь ашколхәыҷқәа хылаҧшра рыҭаны ахысра иаладырхәит. Ашкол аҿы ахысратә ҟазара аизырҳаразы ҳамҭас ирырҭеит апневматикатә шәақь. Акомандаҟаҵара-ҧшыхәратә центр аҿы ашколхәыҷқәа ирзымҩаҧыргаз аекскурсиазы Аконгресс агәыҧ иҭабуп ҳәа рарҳәоит Аҧсны Атәылахьчара аминистрра.

Аҭыҧантәи ахаҭарнакрақәа аус рыцура иазку Адунеизегьтәи аҧсуа-абаза конгресс аҟәша иацнаҵоит апроект «Аимадара». 

Изаамҭанытәиу аекскурсиатә ҭыҵра рхы аладырхәит Иуа Папасқьыр ихьӡ зху Чхәарҭалтәи абжьаратә школ аҵаҩцәа. 

Ашколхәыҷқәа аҭааит Афон Ҿыц иҟоу астанциа Ҧсырӡха, аҳаҧы, Мгәыӡырхәа ақыҭан иҟоу амилаҭтә парк «Аҧсны». Уаанӡа ишаҧу еиҧш ахәыҷқәа ахыци ахәымпали рыла идырхысит. 

Аекскурсиа аиҿкаараан иҟарҵаз ацхырааразы Аконгресс агәыҧ иҭабуп ҳәа рарҳәоит Афонҿыцтәи аҳаҧы аколлективи, аиҳабы Мирон Чалмази. 

Апроект «Аимадара» хықәкыс иамоуп аҿар рыбжьара акультура-ҭоурыхтә хәдурақәа раларҵәара.  Аиҿкааҩцәа иргәиҭоуп анаҩсгьы ақыҭа школқәа рҵаҩцәа рзы аекскурсиақәа реиҿкаара.