Аспектакль «Ромеои Џьульеттеи» апремиера мҩаԥысит Самсон Ҷанба ихьӡ зху Аԥсуа драматә театр аҟны, нанҳәа 21 рзы.
Саид Барганџьиа
Уилиам Шекспир ԥсра зқәым итрагедиа «Ромеои Џьульеттеи» апремиера мҩаԥысит Самсон Ҷанба ихьӡ зху Аԥсуа драматә театр асценаҟны, нанҳәа 21 рзы. Аспектакль аҟны актиорцәа аԥсышәала ицәажәоит. Аспектакль режиссиор-ақәыргылаҩыс дамоуп Урыстәылатәи Афедерациа зҽаԥсазтәыз артист Адгәыр Ақаҩба.
Иара еиҭеиҳәеит, ари еиԥш еицырдыруа аклассикатә аԥҵамҭа ақәыргылара ахатә кәама-ҵамақәа шамоу. Иаҳҳәап, егьырҭ аспектакльқәа рықәыргылараан ирцәыбжьахақәаз алԥшааны ахәаԥшҩы ирбара.
«Ҳара ҳҽазаҳшәеит, зегьы еицырдыруа асиужет анахысгьы, иахьа уажәраанӡа егьырҭ ақәыргылаҩцәа ирызгәамҭкәа инханы иҟаз еиуеиԥшым адетальқәа асиужет ралаҵара», – иҳәеит арежиссиор.
Ақәыргыламҭа ихадоу ҿыцрас иалоу, раԥхьаӡа иргыланы – абызшәоуп, иҳәоит Ақаҩба.
«Ари, адунеи аҿы зегь реиҳа ирепертуратәу апиесақәа ируакуп, иҟалап, зегь реиҳа ирепертуартәзаргьы. Иара ықәдыргылоит зегьы, зехьынџьара, есымша. Даҽа ганкахьала, Аԥсны иара раԥхьаӡа акәны иқәдыргылоит, иара убасгьы раԥхьаӡа акәны аԥсуа бызшәала», – ҳәа азгәеиҭеит иара.
Аспектакль иалагалоу аҿыцрақәа ртәы ҳҳәозар, иазгәаҭатәуп иара убас иҷыдоу арежиссиортә гәҭакқәагьы. Убас, аспектакль аҟны иаҳәоит жанрла еиуеиԥшым амузыка. Адунеитә классикахь иаҵанакуа амузыка адагьы, арежиссиор ихы иаирхәоит ҳаамҭазтәи амузыкатә аԥҵамҭақәагьы. Аспектакль иамоуп даҽа ҷыдаракгьы – ақәыргыламҭаҟны ахархәара рымоуп Александр Пушкин ипиеса «Амырза аныҟазтәи ачаражәреи», Едмон Ростан ипиеса «Сирано Де Бержераки» рҟынтә ацыԥҵәахақәа.
Шекспир ипиеса аԥсшәахь еиҭеигеит Аԥсны Жәлар рпоет Геннади Аламиа. Апоет имҩаԥигаз ари аус ду атәы АААК Аинфопортал иазеиҭеиҳәахьан ииубилеи иазкыз аиҿцәажәараан.
«Шекспир итрагедиа аиҭагара саҿуп», – ҳәа иазгәеиҭеит аиҿцәажәараан апоет.
Иалҵыз аиҭага ахәшьара ҳаракы арҭеит ахәаԥшцәеи, актиорцәеи… арежиссиор-ақәыргылаҩ иакәзар, атекст «гениалтәуп» ҳәа ахиҳәааит
Ихадоу – Џьульетта лроль налыгӡеит актриса қәыԥш Лоида Ҭырқьԥҳа, ари аспектакль аҟны ахәмарразы лымкаала Фазиль Искандер ихьӡ зху Аурыс драматә театр аҟынтә ааԥхьара зырҭаз.
«Сазымхәыцкәа, иаразнак – «Ааи! Ибзиоуп! Џьульетта лроль насыгӡоит!» ҳәа аҭак ҟасҵеит. Сгәанала, дарбанзаалак актриса Џьульетта лроль анагӡара гәаҳәарас илымоуп, сара даараӡа сеигәырӷьоит убри аҩыза алшара ахьсоуз», – лҳәеит Ҭырқьԥҳа.
Аҩбатәи аилазаара аҟны Џьульетта лроль налыгӡоит актриса қәыԥш Лана Џьапуаԥҳа. Ромео ироль наигӡоит – Аԥсуа драмтеатр актиор Бенар Ақаҩба.
Иахьазы Аԥсуа театр аҟны актиор қәыԥшцәа рацәаҩуп, уи абзоуралоуп, атеатр адиректор хада Нодар Ҷанба иажәақәа рыла, ари аԥҵамҭа ақәыргылара заԥшьыргазгьы.
«Ҳара ҳаигәырӷьоит ҳтеатр аҟны актиор қәыԥшцәа ахьырацәоу, уажәааигәа урҭ ирыцлеит петербургтәи, москватәи иреиҳаӡоу атеатралтә ҵараиурҭақәа роушьҭымҭацәа. Раԥхьаӡа иргыланы, ари – аҿар злахәу қәыргыламҭоуп», – иазгәеиҭеит Ҷанба.
Апремиера аҽны Аԥсуа ҳәынҭқарратә драматә театр ихадоу азал ҭәын. Амузыка, алашара, азал аҟны аҳра зуаз аҭынчра – ари зегьы, ҳәарада, ахәаԥшҩы даҽа дунеик ахь дагон, уи адунеи ахь «мҩақәҵаҩцәас» иҟан актиорцәа.
Ахәаԥшцәа лымкаала актиорцәа ркостиумқәа ирызҿлымҳан. Акостиумқәа зӡахуаз уи аус ҭакԥхықәрала иазнеит – аҭоурыхтә материалқәа ҭҵааны, аспектакль аҟны иарбоу ахҭысқәа анымҩаԥысуаз аамҭазы Верона инхоз ауааԥсыра рышәҵатәқәа ирҿыԥшноуп акостиумқәа зегьы зыӡахыз.
Аспектакль апремиерахь абилеҭқәа рыҭира ишналагаз нахыс, атеатр абзиабаҩцәа иаразнак урҭ раахәара иалагеит.
Аҟәатәи ахәаԥшҩы ари аҩыза угәы аҟынӡа инеиуа аспектакль акыраамҭа дазыԥшын.
«Ари аспектакль даараӡа иџьашьахәын. Азныказы ҳаамҭазтәи амузыкеи аклассикатә музыкеи реишьашәалара агәыҩбара сызцәырнагеит, аха аамҭак ашьҭахь, ари аспектакль даҽакала схаҿы исзаагомызт. Зегьы даараӡа иԥшӡан, аинтерес аҵан, аха зегьы реиҳа ихадаз – зегьы ԥсышәа мацарала акәын ишымҩаԥысуаз», – лҳәеит ахәаԥшҩы Мадонна Дарчам.
Апроект адгалыҩцәас иқәгылеит – Адунеизегьтәи аԥсуа-абаза конгресси, уи Иреиҳаӡоу ахеилак ахантәаҩы Мусса Егзакьи, Москватәи аԥсуа диаспора аиҳабы, АААК Иреиҳаӡоу ахеилак алахәыла Беслан Агрбеи.
Апремиера иақәымшәаз ахәаԥшцәа аспектакль рбар рылшоит нанҳәа 23 рзы.
«Ромеои Џьульеттеи», ҳәарада, ианшлагтәу Аԥсуадрам аспектакльқәа ируакхоит.
шәҭалароуп, ма шәыҽҭажәыҩроуп.