АААК ахантәаҩы Мусса Егзакь Аԥсныҟа иаара иалагӡаны Баслахә ақыҭа даҭааит, уаҟа еиҿкаау Аҭыԥантәи аҟәша ахаҭарнакцәа дырԥылеит.
Адунеизегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакь усутә ныҟәарала Аԥсны иҟазаара иалагӡаны Баслахә ақыҭа даҭааны Аҭыԥантәи аҟәша актив дырԥылеит ахәаша, хәажәкыра 26 рзы.
Аиԥылара мҩаԥысит Ҷыҷыкәа Хьиба ихьӡ зху Баслахәтәи абжьаратә школ аҟны. Иааз асасцәа – Мусса Егзакьи Аконгресс аусзуҩцәеи – уаҟа ачеиџьыка рхианы ирзыԥшын актив ахаҭарнакцәа, ашкол аколлективи ԥсыуа маҭәала еилаҳәаз аҵаҩцәеи. Ахәыҷқәа ҷыдала асасцәа раара рҽазыҟарҵеит, иддырбеит Нарҭаа репос аҟынтә ақәыргыламҭа.
Аҭыԥантәи аҟәша актив рацәажәараан Мусса Егзакь еиҭеиҳәеит аԥсуа қыҭақәа рыҿиара аганахьала гәаанагарас имоу.
«Анцәа иумҳәан еибашьрак ҟало, аха уи зысҳәо, Аԥсадгьыл ахьчаразы агылара анаҭаху – зегьы иаҳдыруеит иҟаҵатәу шыҟаҵатәу. Аха аҭынч ԥсҭазаара аныҟоугьы ахандеира аҭахуп, еиҳамзар еиҵымкәа аџьабаа батәуп. Зны-зынла иуадаҩуп ауаҩы иҟынӡа анагара, шаҟа аҵанакуа аихӡыӡаара, аидгылара, аицхыраара, шаҟа аӡбар алшо баша гәаартылатәи аицәажәара, уи ақыҭа апроблемақәа инадыркны ҭаацәарак, ма уаҩытәыҩсак ипроблемақәа рҟынӡа. Иахьанатә ҳҿаԥхьа ахықәкы ықәҳаргылозароуп 5-10 шықәса ирылагӡаны иҟаҳҵаша ҳәа, нас уи аганхьала аусура ҳалагароуп. Убас шьаҿацыԥхьаӡа иаҳго аиааира хәыҷқәа еиҳагьы ҳаидыркылоит, ҳԥеиԥш ҳнапала иаҳчаԥартә ҳҟалоит. Ҳара ҳахәҭаахьала иҟоу алшарақәа зегь ҳхы иаҳархәалоит. Иахьазы абри оуп ихадоу хықәкыс иҳмоу», – иҳәеит АААК Иреиҳаӡоу ахеилак ахантәаҩы.
Ашкол адиректор Асида Ԥачлиа гәахәара дула асасцәа дырԥылеит.
«Иахьа гәырӷьамшуп ҳара ҳзы, харантә даҳҭааит Адунеизегьтәи аԥсуа-абаза конгресс ахантәаҩы Мусса Егзакь. Арахь иаара зыбзоуроу акоуп ҳара ҳашколи Мықәтәи ашколи Нарҭаа репос адырра иазкыз ареспубликатә еицлабраҿы ҳиааира. Даара иаҳҭахуп ҳхәыҷқәа абас еиԥш ҳтәылазы аҵакы змоу аусмҩаԥгатәқәа зегьы ирылахәзарц. Аконгресс изныкымкәа ҳашкол иацхраахьеит, аспорттә инвентари аканцелиартә маҭәахәқәеи рыла ҳаибыҭараҿы. Иҭабуп ҳәа расҳәоит абри ацхыраара иалахәу зегьы», – ҳәа азгәалҭеит адиректор.
Аицәажәара ашьҭахь ашкол анапхгара еиҭарҳәеит дара рҟны традициак аҳасабла ишаԥу аҵлеиҭаҳара: арахь имҩахыҵуа асасцәа дуқәа зегьы Аԥсуа ашәҟәыҩҩцәа ргәалашәра апарк аҟны ҵлак-ҵлак еиҭарҳауеит. Ирацәоуп ашәҟәыҩҩцәа рнапала еиҭарҳахьоу аҵлақәагьы. Ари атрадициа ахы икит ашкол ԥыхьатәи адиректор, 50 шықәса инареиҳаны араҟа аус зухьаз Ҷыҷыкәа Хьиба. 2016 шықәсазы Ашәҟәыҩҩцәа рпарк аԥсуа поет Иван Ҭарба ихьӡ ахҵан, уи ихьӡ зну агәалашәратә хаҳә ықәҵан. Ари атрадициа иахьанӡагьы иааргоит. Мусса Егзакь ашкол анапхгара иҟарҵаз ааԥхьара идикылан, апарк аҟны аҵла қәыԥшқәа еиҭеиҳаит.
Абри ашьҭахь Егзакь Чрыгаа рҭаацәа рахь дымҩахыҵит. Абар уажәшьҭа шықәсык ҵуеит баслахәааи, Аконгресси, агәыҳалалцәеи рымчқәа еилаҵаны ари аҭаацәа рзы аҩны аргылара иаҿуижьҭеи.
АААК ИА ахантәаҩы ҩаԥхьа иазгәеиҭеит, аидгылареи аицхыраареи аныҟоу иарбан усзаалакгьы шуқәҿио.
«Аӡәи-аӡәи ҳаицхыраар, ҳаззымиааиуа акгьы ҟалом. Ари даара акраҵанакуеит, ҳаихӡыӡаалароуп, иҳагу-иҳахӡу еибаҳҳәалароуп, қыҭак еицатәу ауаа, аигәылацәа ҭаацәак реиԥш еизааигәазароуп. Агәылеи агәи ҳәа баша ирҳәом. Анцәа иҳәааит, абас аус бзиақәа рзы еснагь ҳаидгыло, ҳаихәо!» – ҳәа азгәеиҭеит иара.
Баслахә ақыҭа ахада Даур Паӷәаа даҽазныкгьы Аконгресс акомандеи Мусса Егзакьи иҟарҵо ацхырааразы иҭабуп ҳәа реиҳәеит.
«Баслахәаа ҳзы иахьа акрызҵазкуа мшуп, ҳара ҳзы ипатууп, иагьхҭыс дууп Мусса Егзакь иеиԥш иҟоу ауаҩ иԥылара. Иҭабуп ҳәа иаҳҳәоит аамҭа алхны дахьаҳзааз. Уажә амшқәа еилахәеит азы аҩныргылара аамҭала иаанкылоуп. Аха аԥхьан еиԥш ақыҭа зегь ара иҟоуп, доусы илшо ала ари аҭаацәара ирыцхраауеит. Баслахә ақыҭа ахадара рыхьӡала иҭбуп ҳәа расҳәоит уи азы», – иҳәеит Паӷәаа.
Мусса Егзакь Аԥсны дааны дыҟан хәажәкыра 24-27 рзы. Ара иҟазаара иалагӡаны Аԥсны ахада Аслан Бжьаниа дидикылеит, анаҩс ахада Аконгресс аофис ахьгьы дымҩахыҵит аколлектив русушьа ибарц. Егьырҭ амшқәа рзы АААК Иреиҳаӡоу ахеилак ахантәаҩы дырԥылеит Иреиҳаӡоу ахеилаки Аҳәса рхеилаки рхаҭарнкцәа, иара убас Аҟәа, Аҳабла ҿыц аҟни Баслахәи еиҿкаау аҭыԥантәи аҟәшақәа рактивқәа.
шәҭалароуп, ма шәыҽҭажәыҩроуп.