Адунеизегьтәи аԥсуа-абаза конгресс иатәу Аҿар рхеилаки Аҳәса рхеилаки Аиааиреи Ахьыԥшымреи рымш азы Аҟәа аԥшаҳәаҿы ахәыҷқәа рзы аныҳәа мҩаԥыргеит.
АААК аныҳәатә программа цәыббра 30 рзы Аҟәа аԥшаҳәаҿы еизнагеит хәыҷи-дуи рацәаҩны: ақалақьуаа рылаҿы иааит Аконгресс адырга ҷыда зныз ақьала ԥшӡа, аныҳәа алагаанӡагьы ауаа ари аҭыԥ иадеизалахьан.
Ахәыҷқәа азҿлымҳара ду рыманы аиҿкааҩцәа иразҵаауан, Аконгресс адырга иану аеҵәақәеи анапи ҵакыс ирымоузеи ҳәа. Нас еиҭарҳәон апарад аҿы ирбаз арратә техника – атанкқәеи авертолиотқәеи рыӡбахә.
Ари аусмҩаԥгатә еиҿкаан АААК иатәу Аҿар рхеилаки Аҳәса рхеилаки рымчала. Урҭ аҩбагьы Аконгресс аструктураҿы ааигәаӡоуп ианаԥҵаз, машәырлагьы акәым уи шыҟалаз. Аконгресс даара игәцарактәуп ҳәа аԥхьаӡоит аҿар аус рыдулара азҿлымҳара ҷыда аҭара: убри аҟнытә Аԥсны араионқәа зегьы рҟны иаԥҵахоит аҿар рхеилак арегионалтә ҟәшақәа. Ихадароу даҽа хыдҵак акәны иҟоуп – активла зхы аазырԥшуа Аԥсны аҳәсақәа реидкылара, атәыла иахәо аусқәа рынагӡаразы.
АААК Аҿар рхеилак анапхгаҩы Леван Торчуа иажәақәа рыла, ари аусмҩаԥгатә еиҿкаан, раԥхьаӡа иргыланы, ахәыҷқәа рзы. Избанзар ахәыҷқәа ирылааӡатәуп ртәыла афырхаҵаратә ҭоурых азыгәдура, аҵеицәа гәымшәақәеи атәыла знысыс амҩеи рыӡбахә рзеиҭаҳәалатәуп.
«Аныҳәа даара ибзианы имҩаԥысит, ахәыҷқәа аҳамҭақәа роуит, ргәалаҟара бзиан, урҭ ирахәмаруан аниматорцәа. Зегьы ргәалашәараҿы инхеит еизаз рыбжьара амилаҭ кәашараҟны аицлабра. Аӡбаҩцәас иҟан ахәаԥшцәеи, «ҳаеҵәахә» қәыԥшқәа – Милена Торчуаԥҳаи, Валериа Адлеиԥҳаи. Ахәыҷқәа урҭ анырба иаҳагьы агәацԥыҳәара роуит. Гәахәара дууп, зыкәашаратә ҟазара аазырԥшырц зҭаххаз ахьырацәахаз», – иҳәеит Торчуа.
Аҷкәынцәа рыбжьара иреиӷьу акәашаҩ ҳамҭас ирҭеит ашәуа ҟаза Муҳамед Соснаҟ инапала иҟаиҵаз аԥаҭхь, АААК адырга ҭаԥҟаны. Иара уи аҟаза инапкымҭоуп аҭыԥҳа лҳамҭагьы – амилаҭтә дыргақәа рыла иҩычоу ахәдахаҵа. Акциа иалахәхеит иара убас ахәаахәҭратә ҩны «Аҟәа», уи аусзуҩцәа ахәыҷқәа зегьы аршәы хаа рзыршеит.
АААК анагӡаратә маӡаныҟәгаҩ Инар Гыцба иажәақәа рыла, Аконгресс ақьала иаднаԥхьалеит аиҳабыра абиԥара рхаҭарнакцәагьы маҷымкәа: ауаа аинтерес рыман аконгресс алалара шалшо.
«Изҭахыз зегьы алшара рыҭан иара уа аҭыԥан анкета ахарҭәааразы. Аконгресс иалацәажәоит, аӡбахә бзианы ирҳәоит, уи ҳара иҳаҳауеит. Ауаа гәахәарала ирыдыркылоит ҳагәҭакқәеи ҳхықәкқәеи, АААК аусқәа ирылахәзарц рҭахуп, азеиԥш ус иахәар рҭахуп. Експериментк аҳасабала имҩаԥаҳгеит аицлабра, ҳтәылауаа Аконгресс аҭоурых ахьынӡардыруа аилкааразы, даарагьы иџьаҳшьеит уи активла иалахәхаз рхыԥхьаӡара арацәара», – ҳәа еиҭеиҳәеит Гыцба.
Адунеизегьтәи аԥсуа-абаза конгресс аҭоурых адырразы аицлабра авикторина еиԥш имҩаԥысуан, иеизаз азҵаарақәа рырҭон, дара аҭакқәа ҟарҵон. Амҩаԥгаҩ азҵаарақәа ҟаиҵон Аконгресс аԥҵара аҭоурых иазкны, уи Аԥсны имҩаԥнаго аусура иазкны.
Зегьы деицгәарҭеит азҵаарақәа зегьы рҭак иашаны иҟазҵоз арԥыс. Абас инҭырҳәцааны Аконгрес аҭоурых абаудыруеи ҳәа ианизҵаа, иҳәеит ааигәа АААК апортал аҟны иҽышҭеиҩыз, уи иану аматериалқәа зегьы дышрыԥхьаз, Аконгресс аҭоурых иазку алонгридгьы уахь иналаҵаны.
«Иаку, иузеиҩымшо. Адунеизегьтәи псуа-абаза конгресс аҭоурых аҟынтә»: алонгрид ахәаԥшра>>
Аныҳәахь ҷыдала ааԥхьара рыман агәыҳалалратә еиҿкаарақәа «Ашанеи» «Кьарази» хылаԥшра ззыруа ахәыҷқәа. Урҭ ирзырхиан еиуеиԥшым аҳамҭақәа.
Акультуратә-гәыҳалалратә фонд «Ашана» Ацхырааҩцәа рхеилак ахантәаҩы Изольда Ҳагԥҳа лымкаала иазгәалҭеит аныҳәа аиҿкааҩцәа ридеиа – аибашьцәа рхәыҷқәа иҭабуп зҳәо асалам шәҟәқәа рыҭара.
«Гәахәароуп, ари аныҳәа аиҿкааҩцәа «Ашанеи» «Кьарази» хылаԥшра ззыруа ахәыҷқәеи, аибашьра аветеранцәа рхәыҷқәеи ҷыдала иахьрызнеиз. Аҳамҭақәа рнаҩсангьы ахәыҷқәа ашәҟәқәа рырҭеит, рабацәа Аиааира аагара ахьдырааигәоз азы иҭабуп ҳәа ахьрарҳәо. Ари даара ибзианы иазнеиуп ҳәа сгәы иаанагоит, ахәыҷқәа инагӡаны ирзеилымкаауазар ҟалоит аибашьраҿы доусы илагала шаҟа аҵанкуа, рабацәагьы уахь иналаҵаны. Убри аҟнытә акраҵанакуеит абарҭ ашәҟәқәа рыбзоурала иаҳагьы рабацәа ирылаҽхәо иахьыҟало», – лҳәеит Ҳагԥҳа.
Агәыҳалалратә ауаажәларратә еиҿкаара «Кьараз» анагӡаратә директор Камма Гоԥиаԥҳа иазгәалҭеит, ҩызара рызҭо аилахәыра «Аҟәафони» дареи еилахәны Аԥсны Аџьынџьтәылатә еибашьра аветеранцәа рҭаацәарақәа ацхыраара ҷыда шрырҭо.
«Ахәҷқәа раԥхьаӡа акәны Аиааира амшныҳәа иаԥылоит аҳҭнықалақь аҿы, ажәлар зегьы ирыцны. АААК иаԥшьнагеит ари акциа, аветеранцәа рхәыҷқәа рзы иазнархеит иҷыдоу апрограммеи аҳамҭақәеи. Ари акциа абзоурала аветеранцәа даҽазнык «иҭабуп» ҳәа раҳҳәаразы алшара ҳауит, урҭ рхәыҷқәа рыла. Хылаԥшра ззаҳуа ахәыҷкәа еилыркаауазароуп, даргьы аҳәынҭқарра аргылара ишалахәу, ҳҳәынҭқарра аԥеиԥш даргьы рнапы ишану, уи азы аҭакԥхықәра шрыду. Урҭ рабацәа иҭабуп ҳәа раҳәарала даҽазныкгьы иааҳарԥшуеит шаҟа ҳаҭыр рықәаҳҵо, избанзар аибашьцәа роуп иаҳзаазгаз аиааиреи, аҭынчреи, ахақәиҭреи, урҭ рхәыҷқәагьы ари амҩа лаша иацырҵароуп», – ҳәа лгәаанагара лҳәеит Камма Гоԥиаԥҳа.
Аиааиреи Ахьыԥшымреи рныҳәамш аҽны Аԥсны аҳҭнықалақь аҟны еизоит ҳтәыла араионқәа зегьы рҟынтә ауааԥсыра, аҳәаанырцәынтә иаҳҭаауеит асасцәа. Хәыҷи-дуи аныҳәатә усмҩаԥгатәқәа ирылахәуп, адныҳәаларақәа еибырҳәоит, афырхацәа иҭабуп ҳәа рарҳәоит Аиааиразы. 2018 шықәсазы Аԥсны иазгәарҭоит 1992-1993 шықәсқәа рзтәи Аџьынџьтәылатә еибашьраҿы Аиааира 25 шықәса ахыҵра, аиубилеитә рыцхә иаҳагьы инарҭбааны иазгәарҭоит.
Дети в восторге, а это главное. Спасибо всем участникам.
Было очень эмоцианально. Спасибо всем кто был рядом.
шәҭалароуп, ма шәыҽҭажәыҩроуп.