Аԥсны жәлар рзы ахақәиҭреи ахьыԥшымреи – шьала иаагоу, иԥшьоу акоуп ҳәа азгәеиҭеит АААК Иреиҳаӡоу Ахеилак ахантәаҩы Мусса Егзакь, Аԥсны зхы иақәиҭу ҳәынҭқарак аҳасабала ахьыԥшымра азхаҵара амш жәашықәса ахыҵра иазкны иҟаиҵаз адныҳәалараҿы.

Иара иациҵеит, Аԥсны Аџьынџьтәылатә еибашьраҿы игаз илахьынҵаӡбагаз Аиааира аамышьҭахь аусура шьарда шымҩаԥгаз, Аԥсны зхы иақәиҭу, ихьыԥшыму ҳәынҭқаррак аҳасабала жәларбжьаратәи азхаҵара аиура аганахьала аусурагьы уахь иналаҵаны. 

«2008 шықәса, нанҳәамза 26 – епохалтәу рыцхәуп ҳаамҭазтәи Аԥсны аҭоурых аҟны. Урыстәылатәи Афедерациа зегь раԥхьа Аԥсны ахьыԥшымра азханаҵеит, раԥхьаӡагьы иргыланы, уи иаанагоз Аԥсны жәлар ршәаҭадара ашьақәырӷәӷәара акәын. Абри амш инаркны Аԥсны аԥеиԥш лаша аагаразы алшара ҿыцқәа ҟалеит: Аԥсныи Урыстәылеи рыбжьара аҳәынҭқарратә еизыҟазаашьақәа рыҿиараҿы апотенциал дуӡӡа нханы иҟоуп, Аԥсны урҭ алшарақәа ахархәара рынаҭоит», – ҳәа азгәеиҭеит Егзакь.

Иара иажәақәа рыла, Урыстәыла – зымҽхаки зылшарақәеи дуӡӡоу ҳәынҭқарроуп, убри аҟнытә иҳауз азхаҵара – иахьазы зегь иреиҳау еихьӡароуп, насгьы аҵак ду змоу етапуп аԥсуа-абаза жәлар рҭоурых аҟны. Урыстәыла иҟанаҵаз ашьаҿа иадгылеит иара убас атәылақәа акыр: Никарагуа, Венесуела, Шьамтәыла, Науру, Вануату, Тувалу – урҭгьы Аԥсны зхы иақәиҭу ҳәынҭқаррак аҳасабала иазхарҵеит. Иаҳҳәар ҳалшоит иахьазы Аԥсны жәларбжьаратәи аҭагылазаашьа зынӡа даҽакуп ҳәа, 2008 шықәсанӡатәи аамҭа иаҿҳарԥшуазар.

Иара иациҵеит иара убас, Урыстәыла – Аԥсны ҩызара азызуа ҳәынҭқаррак аҳасабала – аԥсуа-абаза жәлар реидкыларазы алшара ҿыцқәа аԥнаҵар ауеит ҳәа, ус анакәха ҳара ҳхаҭақәа имҩаԥааго хра злоу аусқәа рыла ҳажәлар реизакра аҭоурых аҿы адаҟьа ҿыц ааҳартыр ҳалшоит ҳәа.

2008 шықәса, нанҳәамза 26 рзы Урыстәылатәи Афедерациа иазханаҵеит Аԥсныи Аахыҵ Уаԥстәылеи рхьыԥшымра. Аԥсны зхы иақәиҭу ҳәынҭқаррак аҳасабала иазхарҵеит иара убас Никарагуа, Венесуела, Науру, Вануату, Тувалу. 2018 шықәса, лаҵарамзазы Аԥсны ахьыԥшымра шазханаҵаз азы аҳәамҭа ҟанаҵеит Шьамтәылагьы.