Адунеизегьтәи аԥсуа-абаза конгресс ишәыднагалоит «АААК ахаҿқәа» ҳәа хьӡыс измоу апроект ҿыц – Аконгресс агәыԥ иалоу рыҿцәажәарақәа еидызкыло авидеопроект авторс дамоуп Аинфопортал аредактор хада Амина Лазԥҳа.
Амра Амҷԥҳа
Аконгресс иазнархиеит авидеоинтервиуқәа рицкл, апроект ҿыц «АААК ахаҿқәа» аҳәаақәа ирҭагӡаны, уи еиднакылоит аиҿкаара иалоу ауаа рыҿцәажәарақәа. Абри азы адырра ҟалҵеит АААК аинфопортал аредактор хада Амина Лазԥҳа. Лара лоуп ари апроект авторс иамоугьы.
Лазԥҳа лажәақәа рыла, Аконгресс аилазаашьа ҿыц шьақәгыланы аус ауеижьҭеи уажәшьҭа хәышықәса ирықәуп (ԥхынҷкәын8, 2017 шықәсазы Адунеизегьтәи аԥсуа-абаза конгресс VII аизара ду аҟны аиҿкаара Аԥҟаԥҵәа ԥсахын, Аконгресс ахада имаҵура аԥыххеит, уи ацымхәарас еиҿкаан Иреиҳаӡоу ахеилак, уи ахантәаҩысгьы еицҿакны далхын Мусса Егзакь – аред. иазгә.), убри аҟнытә иӡбан Аконгресс акоманда шьақәзыргыло ауаа рыӡбахә иаҳа инарҭбааны ажәлар ирызнагазарц.
Апроект аиҿкааҩцәа иҭарыҩхьеит Аҟәа иҟоу Аконгресс аофис аусзуҩцәа ԥыҭҩык рыҿцәажәарақәа. Анаҩстәи шьаҿахоит Санкт-Петербург иҟоу АААК Аппарат хада аусзуҩцәеи, АААК Иреиҳаӡоу ахеилак алахәцәеи рыҿцәажәарақәа.
Раԥхьатәи аҭыжьымҭақәа ԥшьба рҿы аиҿцәажәара мҩаԥызго Амина Лазԥҳа лколлегацәа илзеиҭарҳәоит доусы инапы злаку, идунеихәаԥшышьа зеиԥшроу.
«Аинтервиуқәа зегьы аиҩызаратә еицәажәареиԥш имҩаԥысит. Сызҵаарақәа рҭак ҟаҵо сколлегацәа исзеиҭарҳәоит ирыԥсҭазаашьоу, мҩас изнысхьоу, гәҭакыс ирымоу, еиуеиԥшым азҵаарақәа ишырзыҟоу. Сколлегацәа рахьтә иҟоуп схәыҷаахыс издыруа, шьоуки сареи астудентра аамҭазы ҳаибадырит, иҟоуп Аконгресс аҿы издырызгьы. Аха ҳара зегь активла аус еицаҳауеит аҟнытә рыҿцәажәара сзыманшәалан, аҽаартра рылшартә еиԥш азҵаарақәа рысҭон», – ҳәа еиҭалҳәеитАмина Лазԥҳа.
Уи иацҵангьы илҳәеит авидеоинтервиу ажанр аҟны раԥхьаӡа акәны лхы шԥылшәаз. Апроект автор, амҩаԥгаҩ дақәгәыӷуеит Аԥсны аҩнуҵҟа нас уи анҭыҵгьы ахәаԥшцәа азҿлымҳахап ҳәа, аиҿцәажәарақәа аинтерес рыманы имҩаԥыслап ҳәа.
Апроект аҭыжьымҭақәа зегьы АААК аинфопортал ахәбызшәак рахь еиҭаганы асаит иҭагалахоит, аҳәаанырцәтәи ҳдиаспорагьы Аконгресс аусзуҩцәа еиҳа иаагәаны ирдырырц.
Амина Лазԥҳа раԥхьатәи аҭыжьымҭақәа рзы иалырхыз афырхацәеи апроект асасцәас изызхәыцуаз азусҭцәази дазааҭгылеит.
«Раԥхьаӡатәи аҭыжьымҭа зегьы иҳаиҳабу, агәы ҳазҭазҵо АААК Иреиҳаӡоу ахеилак ахантәаҩы Мусса Егзакь ила ҳалагарц ҳгәы иҭан. Аха лассы Аԥсны Жәлар Реизарахь алхрақәа мҩаԥысраны иҟоуп аҟынтә – уи ҳколлегацәагьы алахәуп –дара рыла ҳалагарц ҳаӡбеит. Зыӡбахә сымоу Инар Гыцбеи, Изольда Ҳагԥҳаи, Ҭемыр Рекәааи, Дмитри Жьибеи роуп», – ҳәа азгәалҭеит апроект автор.
Апроект аинформациатә дгылара анаҭеит ателеканал Абаза ТВ. АААК аинфопортал иахьҭагалахо адагьы, аҭыжьымҭақәа зегьы ателехәаԥшрала ирышьҭуеит. Абаза ТВ адиректор хада Руслан Ҳашыг иазгәеиҭеит, апроект «АААК ахаҿқәа» ателехәаԥшра адырраҭарақәа ртематика арбеиоит, ателехәаԥшцәагьы еиҳа аднаԥхьалоит ҳәа.
«Иарбан усзаалак аҿы ақәҿиара ануоуа – ламысла зус иазнеиуа, уи аҵыхәтәанӡа иназыгӡо ауаа аныҟоу ауп. Ҳара зегь ҳгәы иҭаҳкуа аус, ма апроект анагӡараан мҩакы ҳанысуеит. Ателехәаԥшратә ефир азы доусы иԥсҭазаараҿы дызнысхьоу амҩа, ирҳаз аԥышәа – зеиӷьыҟам материалуп, иунарбоит ҳакәша-мыкәша иҟоу ауаа зҿу, еихьӡарақәас ирымоу», – иҳәеит Ҳашыг.
Иара зеиԥшла ахә ҳаракны ишьеит Аконгресс аусура, ихәарҭоу, аинтерес зҵоу апроектқәа нанагӡоит ҳәа ахиҳәааит – аҵараиура иазку инадыркны ақыҭанхамҩа иазку рҟынӡа.
«Аҵыхәтәантәи ашықәсқәа рзы Аконгресс аусура амҽхак акырӡа иарҭбааит еиуеиԥшым ахырхарҭақәа рыла. Ҳара ҳканал аҿы акыраамҭа иҳашьҭуан аԥсшәа аҵара иазкыз АААК апроект. Уи ашьҭахь ҳусеицура иҵегь иацаҳҵар иашоуп ҳәа ҳаԥхьаӡоит. Ахәаԥшцәа рзынгьы уи бзиоуп – ирзеиӷьу аматериалқәа еиҳа ирацәахар», – ҳәа игәаанагара ҳацеиҩишеит Абаза ТВ адиректор хада.
Апроект «АААК ахаҿқәа» раԥхьатәи аҭыжьымҭа жәбар шәылшоит Абаза ТВ аевир аҿы хәажәкыра 1, асааҭ 21:00 рзы. Уи далахәуп Аконгресс ауснагӡаратә маӡаныҟәгаҩ Инар Гыцба.
Апроект еиҿкаауп АААК Аинформациатә портал амчала: аҭыхҩы-ақәыргылаҩ Илона Хәарцкьиа, аҭыхҩы лыцхырааҩ Наала Аҩӡԥҳа, амонтаж – Илона Хәарцкьиа, Камилла Кирвал, авидеографика – Наур Хышба, автор, амҩаԥгаҩ – Амина Лазпҳа.
шәҭалароуп, ма шәыҽҭажәыҩроуп.