Лента событий ВААК
Харитон Агрба IBA адунеи ачемпион атитул дазықәҧаҩхеит.
"IBA ачемпионцәа рыхәылҧаз" зыхьӡыз аицлабраҿы
Харитон Агрба Мексикатәи аспортсмен Хосе Мигель Боррего дииааит. Жәа-раундк рыла ишьақәгылаз, зыкапан 67 килограмм еиҳам абоксиорцәа рзы Шәача еиҿкааз аиқәҧара хыркәшан еицҿаку аӡбаҩцәа рыӡбамҭала. 28 шықәса зхыҵуа аспортсмен 14-нтә аиааира игахьеит, зныкгьы даҵамхаӡацт. Ари аиааира иабзоураны, Агрба IBA ачемпионтә маҟа азықәҧаҩ ититул ианашьахеит.
Шәача афедералтә ҵакырадгьыл "Сириус" аҿы аусура иалагеит Адунеизегьтәи аҿар рфестиваль.
Афестиваль агәырӷьаратә аартра азҧхьагәаҭоуп хәажәкырамза 2, аха аҽазыҟаҵаратә аусмҩаҧгатәқәа еиҿкаан иахьа. Адунеизегьтәи аҿар рфестиваль иалахәуп еиуеиҧшым атәылақәа рыҟнытә еизаз 20-нызқьҩык инареиҳаны аҧыза ҿарацәа. Аҧсны ахьӡала аусмҩаҧгатә иалахәуп 100-ҩык инаӡо агәыҧ.
Афестиваль аҳәаақәа ирҭагӡаны имҩаҧысуеит "Акультуратә напхгара" зыхьӡу апрограмма. Афестиваль аҿы Аҧсны кураторра азызуа Чувашиеи Баиконури, ҳтәыла ахаҭарнакцәеи еиҧылеит. Еиқәшәаз еибадырбеит дасу рмилаҭтә кәашарақәа, еимырдеит агәаларшәагатә ҳамҭақәеи агәалаҟазаара бзиеи, аччаҧшьи.
Адунеизегьтәи аҧсуа-абаза конгресс афестиваль азыҟаҵареи амҩаҧгареи ирызку Аиҿкааратә еилакы иалоуп. Аделегациа алахәҩцәцәа рахь иаҵанакуеит: аҿар рыҿиареи абаҩрҵәыреи рзы АААК аҟәша анапхгаҩы Валери Берзениеи, аҭыҧантәи аҟәшақәа аус рыцуразы АААК аҟәша аспециалист Херсон Симониеи. Адунеизегьтәи аҿар рфестиваль аҳәаақәа ирҭагӡаны, астол гьежь аҿы ажәахә иманы дықәгылоит АААК Ауснагӡаратә маӡаныҟәгаҩ, Аҧсны Жәлар Реизара адепутат Инар Гыцба.
АААК ахәаҧшҩы қәыҧш игәазыҳәара нанагӡеит
Аҭыҧантәи ахаҭарнакрақәа аус рыцуразы АААК аҟәша еиҿнакааит арасаӡыхьтәи абжьаратә школ №2 аҵаҩцәа С. Ҷанба ихьӡ зху адраматә театр раҭаара. Уи аҧхьаҟа, ахьыҷқәа алахәын аҳҭнықалақь акультура-ҭоурыхтә ҭыҧқәа рҭаара алшара рзаҧызҵаз апроект "Аимадара". Аныҟәараан ахәыҷқәа Аконгресс аҟәша аусзуҩцәа ирзеиҭарҳәеит ргәазыҳәарақәа рахь ишаҵанакуа аҧсуа драматә театр аҭаара. Дук хара имгакәа гәалаҟазаарала иҭәыз ахәыҷқәа еиҭа аҳҭнықалақь ахь иааргеит. 25-ҩык арҵаҩцәеи аҵаҩцәеи мҩахыҵит "Иареи лареи" зыхьӡыз, аҧсуа литература ашьаҭаркҩы Дырмит Гәлиа 150 шықәса аихыҵра иазкыз аспектакль ахь. Ақәыргыламҭаҿы иалахәын Аҧсны зҽаҧсазтәыз артистцәа Виолетта Маанҧҳаи Кьасоу Ҳагбеи. Режиссиорс даман Аҧсны зҽаҧсазтәыз артист Мадина Аргәынҧҳа. Ақәыргыламҭа шьаҭас иамоуп Гәлиа иҩымҭа "Арҧызбеи аҧҳәызбеи рысаламшәҟәы".
Ахәыҷқәа рыҧсы ӡаны асценаҿы имҩаҧысуаз иахәаҧшуан, активла актерцәа рнапы рзеинырҟьон, афырхацәа рыхәмарра цәанырра ҵаулала ирыдыркылон. Ахәыҷқәа аспектакль ашьҭахьгьы ирбаз аҵакы аиҭаҳәара иаҟәыҵуамызт. Ҩашьарада, ари ахәашатәи ахәылҧаз кыраамҭа игәныркылоит.
