Лента событий ВААК
Аҧснытәи ашьапылампыл асцәа ҿарацәа аҭааит "Гранд Каньон" арҿиаратә ҵакырадгьыл
Ашьапылампылтә клуб "Зенит" Аҧснытәи афилиал ааӡамҭацәа аҭааит Санкт-Петербург иҟоу, "Гранд Каньон" арҿиаратә ҵакырадгьыл. "Гранд Каньон" агәыҧ ахаҭарнакцәа ирҭааз ашьапылампыл асцәа ҿарацәа рахь асасдкылара аадырҧшит, ирыздырхиеит аинтерес зҵоу апрограмма. Арҧарцәа аҭааит Санкт-Петербург иҟоу, ақалақь аҿы зегь реиҳа зымҿхак ҭбаау рахь иаҵанакуа, "Высотный город" ашахатә парк, "Музей чудес", "Бестиарий".
Хәажәкырамза 8 инаркны 11-нӡа Санкт-Петербург имҩаҧысуан ашьапылампылтә клуб "Зенит" афилиалқәа рыбжьара аицлабра. Уи иалахәын 2015 шықәсазы ииз Аҧснытәи ашьапылампыл асцәагьы. Арҧарцәа 7-хәмаррак ирылахәын, 3-нтә аиааира ргеит. Аспортсменцәа зегьы иаадырҧшит ашьапылампыл аганахь ала аҽадцалара, ироуит хәы змам аҧышәа. Аспортсменцәа раҧхьаҟа ишьҭоуп ахәмарра ҿыцқәеи агхақәа рыриашареи.
2021 шықәсазы Аҧсны иаадыртит ахәыҷқәеи ақәыҧшцәеи ахьазыҟарҵо аолимпиатә хәмаррақәа ррезервтә школ ашьапылампылтә клуб "Зенит" Академиа афилиал. Адунеизегьтәи аҧсуа-абаза конгресси, хаҭала АААК ИА Ахантәаҩы Мусса Егзакьи ацхыраара ҟарҵеит "Зенит" аиҳабыреи Аҧсны анапхгареи аимадара рыбжьаҵаны, ашкол афилиал Аҧсны аартразы.
