Лента событий ВААК
АААК ИА Ахантәаҩы Мусса Егзакь дрыдышшылеит зыҧсҭазаара иалҵыз Станислав Лакоба иуацәеи иҭынхацәеи
Аҧснынтәи иаҳзааит ажәабжь лахьеиқәҵага. Машәырла дҭахеит Станислав Зосим-иҧа Лакоба. Иналукааша аҵарауаҩ, аҭоурыхҭҵааҩ, ауаажәларратә усзуҩы, лассы-лассы иуҧымло аҟыбаҩи адыррақәеи змаз ауаҩы. Аҧсны азы ари цәыӡ дууп.
Станислав Зосим-иҧа ҳаҭыр дула сизыҟан. Игәаанагара еснагь сазҿлымҳан. Аицәажәараҿы уамак ала даамысҭашәан: амҵақьақьара иламызт, аӡәы сигәаҧхандаз ҳәа дашьҭамызт, еснагь иҳәон игәы ишаанагоз еиҧш. Иарбан зҵааразаалак иара хатәзнеишьала дахәаҧшуан.
Разҟуп ҳәа исыҧхьаӡоит згәаанагареи зыхәшьарақәеи мҩақәҵагоу ауаҩы иҧшаара. Урҭ ауаа еснагь аиаша рҳәоит, даҽакала иудырбоит иӡбоуп ҳәа иҧхьаӡаз азҵаарақәа. Сара сзы ус иҟаз уаҩын Станислав Зосим-иҧа Лакоба. Агәра ганы сыҟоуп Аҧсни уи анҭыҵи сара сеиҧш ихәыцуа ауаа шырацәоу.
Гәыкала срыдышшылоит наунагӡа ҳгәаҵаҿы иаанхо Станислав Зосим-иҧа иуацәеи иҭынхацәеи.
