Адунеизегьтәи
аԥсуа-абаза
конгресс

Санкт-Петербург еиҧылеит аҧсуа-абаза диаспора ахаҭарнакцәеи Адунеизегьтәи аҧсуа-абаза конгресс Иреиҳаӡоу Ахеилак Ахантәаҩы, иавтономтәу икоммерциатәым аиҿкаара «Алашара» Ахада Мусса Хабал-иҧа Егзакьи.

Аусмҩаҧгатә алагамҭазы дықәгылеит Ахада иусбарҭа ахаҭарнак Абзагә Ҵәыџьба. Уи асасцәа дрыдныҳәаланы, иазгәеиҭеит адиаспора аҩнуҵаҟа акзаареи аидгылареи шаарҧштәу. 

Аиҧылараҿы астудентцәа азҵаауан аҿар адиаспора имҩаҧнаго аусқәа ралагалашьеи иҟоу инацҵаны еиҿкаазар зылшо аусмҩаҧгатәқәеи. Мусса Хабал-иҧа Егзакь инаҵшьны иазгәеиҭеит аҿар реидкыларазы аибабареи агәаанагарақәа реимдареи шхымҧадатәиу. 

Аиҧылараҿы Мусса Егзакь еиҭеиҳәеит иҧсҭазаараҿы дзықәшәахьоу ахҭысқәа, урҭ ажәабжьқәа аҿар ргәы шьҭнахит. Иара убасгьы, Мусса Хабал-иҧа аҿар абжьгарақәа риҭеит, ахаҭара арҿиареи еизҳауа абиҧара ауаажәларратә ҧсҭазаара ралархәшьеи дрылацәажәеит.

Аиҧылара иалахәын аграждантә авиациа иазку, А.А. Новиков ихьӡ зху Аҳәынҭқарратә университет астудентцәеи, апрофессор М.А. Бонч-Бруевич ихьӡ зху ателеимадара аҳәынҭқарратә университет астудентцәеи, А.Ф. Можаиски ихьӡ зху Арра-космостә академиа акурсантцәеи. Иара убасгьы, аусмҩаҧгатә далахәын АААК аинформациатә политикеи аимадарақәеи рнапхгаҩы Ҭенгиз Ҭарба. 

Аусмҩаҧгатә ахыркәшамҭазы иалацәажәеит аиҧш зеиҧшу аиҧыларақәа лассы-лассы рымҩаҧгара шыргәиҭоу. Уи хықәкыс иамоуп адиаспора иаҵанакуа аҿари аиҳабыреи реимадара арӷәӷәара. Мусса Хабал-иҧа иазгәеиҭеит арҭ аиҧыларақәа аҧсуа-абаза аҿар реидкылараҿы аҵакы шдуу, аҿар рхаҭарнакцәа аҧсҭазаараҿы рҭыҧ аҧшаареи рҟазшьақәа раарҧшреи ишацхраауа.

Ихацҳаркуеит апроект ҿыц «Гәыкала» — аинтерес зҵоу ауаа рыҿцәажәарақәа. Урҭ — иаҳзеиҧшу апроектқәеи аиҩызареи рыла ҳзыдҳәалоу уаауп. 

Уажәазы дсасны даҳҭан аҵарауаҩ-абызшәадырҩы, адипломат, ауаажәларратә усзуҩы, АААК Иреиҳаӡоу ахеилак алахәҩы Виачеслав Чрыгба. Аҭҵаарадырреи адипломатиеи, аҧсуа бызшәа аиқәырхара иацу ауадаҩрақәа, адунеи ахы-аҵыхәа дакәшаны иибахьоу, уамашәа иубаша ауаа рыҿцәажәара, амилаҭ аидкылараҿы АААК иааннакыло аҭыҧ, уҳәа убас егьырҭ атемақәа - «Гәыкала» раҧхьатәи аҭыжьымҭаҿы.

Аҿар рыҿиареи абаҩрҵәыреи рзы АААК аҟәша иацнаҵоит аҧсуа культуреи, аҵасқәеи, ақьабзқәеи ирызку атематикатә лекциақәа.

Изаамҭанытәиу алекциа мҩаҧган Аҧснытәи аҳәынҭқарратә университет афилологиатә факультет астудентцәа рзы.

Аетнолог, аҭоурыхтә ҭҵаарадыррақәа ркандидат Елисо Сангәлиаҧҳа дрылацәажәеит аҧсуаа рҿы хадара злоу аибагара аформақәа, аҭаца аҩныҟа лнагара иадҳәалоу аҵасқәа, ачара иацааиуеи иашьҭанеиуеи ақьабзқәа рҵакы, иара убасгьы амилаҭтә ҵасқәа рықәныҟәара аганахь ала ажәытәи аҿатәи еиҿырҧшны иҭылҵааит. 

Амилаҭ-қьабзтә усмҩаҧгатәқәа ирызку адискуссиа азыӡырҩцәа рыбжьара аинтерес ацуп. Иазгәаҭатәуп, ари апроект аҳәаақәа ирҭагӡаны, темак иазку алекциа ҩынтәны аҧхьара раҧхьаӡа акәны ишымҩаҧгоу. Уи аҧхьаҟа аиҧш зеиҧшу алекциа еиҿкаан Пицундатәи абжьаратә школ № 1 аҵаҩцәа рзы.

Апроект «Ирӡтәым» хацыркуп 2022 шықәса инаркны. Уи азынархоуп амилаҭтә хәдурақәа рсистема арӷәӷәареи аҿарацәа аҧсуа культура, аҭоурых, адоуҳа-цәаҩашәатә ҧсҭазаара иадҳәалоу рдыррақәа рымҽхак арҭбаареи.

Ишәыдаагалоит афильмқәа рсериа «Хадара злоу иазкны» аҭыжьымҭа ҿыц. Ари аҭыжьымҭаҿы фырхаҵа хадоуп агәыҧ «Алашара» ҩыза бзиас партнерс иамоу, РАН антропологиеи аетнографиеи рмузеи (Кунсткамера) Аиҳабы Андреи Головнев. Апроектқәа рӷьырак алыршан антропологиа Амузеи абзоурала, мамзаргьы хаҭала Андреи Владимир-иҧа дназлоу аекспертцәа алархәны. Иара далахәын хыҧхьаӡарала имаҷу Урыстәылатәи амилаҭ шьагәыҭқәа рфорум, даҭааит Абаза жәлар рыхәмаррақәеи ркультура Амши. А.В. Головнев иоуп иалазгалаз атермин «Егзакь иметод». 

Афильм аҿы Андреи Владимир-иҧа дрылацәажәоит Ҟарачы-Черқьесиа иазку ицәаныррақәа, афестиваль «Абаза», насгьы абаза жәлар рҟазшьа хадақәа. Зус бзианы издыруа аҭоурыхҭҵааҩи аетнологи иҳәоит анаҩстәи: 

«Кавказ саныҟоу сзызкуи сарбануи аиҭаҳәара аҭахым. Аетнографиа, мамзаргьы амилаҭтә хәдурақәеи, аетнокультуратә ҭынхеи ирызку антропологиа ауаҩы ишьа иалоуп. Угәы иаанагар ҟалоит ари аҭҵаарадырра ахыҵхырҭақәа ахьыҟоу Кавказ ауп ҳәа». 

Гәахәарала шәахәаҧшааит!

Aҧсуа режиссер имшира инақәыршәаны, АААК аинформациатә ҟәша иазнархиеит уи иҧсҭазаареи ирҿиареи ирызку аматериал. https://abaza.org/abk/1198