Лента событий ВААК
Аҟәатәи 5-тәи абжьаратә школ аҟны амилаҭтә хәмаррақәа рзы амастер-класс мҩаԥысит.
Адунеизегьтәи аԥсуа-абаза конгресс амилаҭ хәмаррақәа рырҵара иазку амастер-класс ҿыц мҩаԥнагеит Ефрем Ешба ихьӡ зху Аҟәатәи 5-тәи абжьаратә школ аҟны. Имҩаԥигеит АААК Аҿар реизҳареи абаҩрҵәыреи рыҟәша анапхгаҩы Валери Берзениа. Иара ахәыҷқәа ирзеиҭеиҳәеит аԥсуаа рыхәмаррақәа "Аимҵакьачара", "Ахылԥахас" ишыхәмартәу, анаҩс зегьы ааидкыланы иҟаҵатәу шыҟаҵатәу дирбеит.
Ашколхәыҷқәа рыдагьы амастер-класс иалахәын Аԥсуа ҳәынҭқарратә университет астудентцәа Алекс Анқәаб, Коен Быҭәба, Станислав Махров. Дара аҵаҩцәа ирыцыхәмаруан, аӡбаҩгьы ицхраауан.
АААК аҿар рыбжьара амилаҭтә еизыҟазаашьақәа ирызкыз астол гьежь иалахәын.
АААК Аҭыԥантәи аҟәшақәа аус рыцура аҟәша анапхгаҩы Дмитри Жьиба ихы алаирхәит астол гьежь "Аҿар рҟны амилаҭбжьаратә еизыҟазаашьақәа. Аԥсни Урыстәылеи рыбжьара ауаажәларратә усеицура".
Аиԥылара азкын аҩ-тәылак рҟны аус зуа ауаажәларратә институтқәа реимадара арҭбаара азҵаарақәа. Хықәкы хадас иалыркааит Аҟәеи Шәачеи иҟоу ихәаахәҭратәым аиҿкаарақәа рԥызацәа реиҿырцаара.
Астол гьежь еиҿыркааит Аҿари аспорти русқәа рзы Аҳәынҭеилаки, Аԥсны аҿар рассоциациа "Аԥеиԥш".
Аҟәатәи 10-тәи абжьаратә школ аҟны амилаҭтә хәмаррақәа рзы амастер-класс мҩаԥысит.
Адунеизегьтәи аԥсуа-абаза конгресс амилаҭ хәмаррақәа рырҵара иазку амастер-класс мҩаԥнагеит Нестор Лакоба ихьӡ зху Аҟәатәи 10-тәи абжьаратә школ аҟны. АААК Аҿар реизҳареи абаҩрҵәыреи рыҟәша анапхгаҩы Валери Берзениа ахәыҷқәа ирзеиҭеиҳәеит "Аимҵакьачареи", "Ахылԥахаси" ишыхәмартәу.
Аԥҟарақәа анеилыркаа аҿар гәырӷьаҵәа адәаҿы ахәмарра иалагеит.
АААК апроект "Аҿар рыбжьы" Гал имҩаԥысит.
Гал имҩаԥысит апроект "Аҿар рыбжьы" ахыркәшаратә еиԥылара. Ари апроект мҩаԥыргон Адунеизегьтәи аԥсуа-абаза конгресси ашәаԥҵаҩ Абзагә Марыхәбеи еилахәны.
Галтәи аиԥылара рхы аладырхәит Д. В. Мураҭиа ихьӡ зху абжьаратә школ аҵаҩцәа жәаҩык. Аҵаҩцәа ирыҿцәажәеит, рԥышәагьы рымардеит аестрадатә шәаҳәаҩы Артиом Качараа, иара убас амузыктә шоу "Apsny-Star” алахәыла Иракли Џьумуҭиа.
"Ахар рыбжьы" - Аконгресс иаԥшьнагаз агәаҭаратә проектуп, хықәкыс иамоуп Аԥсны абаҩхатәра злоу аҿарацәа раарԥшра. Ихацыркын жәабранмзазы. Раԥхьатәи аиқәшәара мҩаԥган Гәдоуҭа.
